અફઘાનિસ્તાનથી ઈરાન થઈ ગુજરાતમાં મુન્દ્રા પોર્ટ પર 3000 કિલો હેરોઈનના જથ્થા સાથે 7 આરોપીની અટકાયત 

કચ્છ(ગુજરાત): કચ્છના મુન્દ્રા અદાણી પોર્ટ પર 2 શંકાસ્પદ કન્ટેનરની તપાસ કરાતા કરોડો રૂપિયા જેટલો મોટો હેરોઈનનો જથ્થો મળી આવતા સુરક્ષા એજન્સીઓ પણ માથું ખંજવાળતી થઇ છે. આ મામલે તપાસ એજન્સીએ  અત્યાર સુધીમાં 2 લોકોની અટકાયત કરીને આરોપીને કોર્ટમાં રજૂ કરતા કોર્ટે જ્યુડિશિયલ કસ્ટડીમાં મોકલી આપવામાં આવ્યા છે.

મળતી માહિતી મુજબ, ગાંધીધામ ડીઆરઆઈ વિભાગને મુન્દ્રા અદાણી પોર્ટમાં વાયા ઈરાન બંદરથી આવેલા જહાજમાં નશીલા પદાર્થની જથ્થો હોવાના સંકેત મળ્યા હતા. ડીઆરઆઈએ શંકાના આધારે કરેલી તપાસમાં માલસામાનમાં માદક દ્રવ્યો મળી આવ્યા હતા, જે અફઘાનિસ્તાનથી વાયા ઈરાન માર્ગે ભારતમાં સપ્લાય કરવામાં આવતો હતો. માહિતીના આધારે, એજન્સીએ બે કન્ટેનરને અટકાવ્યા હતા. ‘ઇન્ટર સિડની’ નામના જહાજમાંથી DRIએ કબ્જે લીધેલા કન્ટેનરના પદાર્થની ખરાઈ માટે ગાંધીનગર સ્થિત ફોરેન્સિક સાયન્સ લેબોરેટરીના નિષ્ણાતોની હાજરીમાં કન્ટેનરની તપાસ કરવામાં આવી હતી.

એજન્સીનાએ જણાવ્યું હતું કે, નિષ્ણાતોએ સામગ્રીની તપાસ કરી અને હેરોઇનની હાજરીની પુષ્ટિ કરી હતી. પહેલા કન્ટેનરમાંથી DRI ને 1,999.58 કિલો જથ્થો મળ્યો હતો, જ્યારે બીજા કન્ટેનરમાં 988.64 કિલો સામગ્રી મળી આવી હતી, જે કુલ 2,988.22 કિલોગ્રામ હતી. નાર્કોટિક ડ્રગ્સ અને સાયકોટ્રોપિક સબસ્ટન્સ એક્ટ હેઠળ આ વિશાળ જથ્થો જપ્ત કરવામાં આવ્યો હતો.