સાઉથની મોટાભાગની ફિલ્મોમાં દેખાતા આ દિગ્ગજ કોમેડિયન અભિનેતાનું થયું મોત

સાઉથના દિગ્ગજ અભિનેતા વિવેકનું ચેન્નઈની એક હોસ્પિટલમાં નિધન થયું છે. તે 59 વર્ષના હતા. વિવેકને 16 એપ્રિલના રોજ હાર્ટ એટેક આવ્યા બાદ ચેન્નાઇની એક ખાનગી હોસ્પિટલમાં દાખલ કરવામાં આવ્યા હતા. તે હોસ્પીટલમાં ઇસીએમઓ સારવાર લઈ રહ્યા હતા. તે ઘણા દિવસથી આઈસીયુમાં ડોકટરોની દેખરેખ હેઠળ હતા.

જોકે, આજે સવારે 4.45 વાગ્યે તેમણે આ દુનિયાને વિદાય આપી હતી. સાથે સાથે એ પણ જાણવા મળ્યું છે કે વિવેકે કોવિડ રસીનો પ્રથમ ડોઝ પણ લીધો હતો, ત્યારબાદ તે મીડિયાને મળ્યા અને કોવિડ રસી લેવાની જરૂરિયાત વિશે પણ જણાવ્યું હતું.

15 એપ્રિલે, વિવેકને કોરોના રસી લગાવાઈ હતી. વિવેક તેના મિત્ર સાથે કોવિડ રસીનો પ્રથમ ડોઝ લેવા માટે ઓમંડુરર સરકારી હોસ્પિટલમાં ગયા હતા. આ પછી, તેમણે મીડિયા સાથે વાત કરી, જ્યાં તેમણે કહ્યું કે શા માટે તેમણે કોવિડ રસી મેળવવા માટે ખાનગી હોસ્પિટલને બદલે સરકારી હોસ્પિટલ પસંદ કરી.