સુરતમાં કોરોના વચ્ચે થયું અંગદાન: જાણો કોના લિવર અને ચક્ષુના દાનથી ત્રણ વ્યક્તિને મળશે નવજીવન

હાલ ચાલી રહેલી કોરોના મહામારીની બીજી લહેરમાં પહેલીવાર સુરતમાં એવો કિસ્સો બન્યો છે જેમાં અંગદાન કરવામાં આવ્યું છે. જાણવા મળ્યું છે કે, જૈન સુડતાલીસ શ્રીમાળી સમાજના બ્રેઈનડેડ પરેશભાઈ ચંદુલાલ શાહના અંગોનું દાન કરાયું છે. આ અંગદાનથી 3 વ્યક્તિને નવું જીવન મળી શકે તેમ છે. ફાઈનાન્સ કંપનીના મેનેજર તરીકે કામ કરતા પરેશભાઈ શાહના લિવર અને ચક્ષુઓનું દાન કરતા 3 વ્યક્તિના જીવન ફરી નવજીવન થઈ શક્યાં છે.

મળતી માહિતી મુજબ, પરેશભાઈ મજુરાગેટ પાસે આવેલ બોથરા ફાઈનાન્સ લિ.માં મેનેજર તરીકે ફરજ બજાવતા હતા. આ કોરોના મહામારીના કારણે તેઓ થોડા દિવસ રાજા પર હતા. બુધવાર તા.12મેં ના રોજ પરેશભાઈ તેમની પત્ની પદ્માબેન સાથે આ કંપનીમાં તેમનો પગાર લેવા માટે ગયા હતા. આ દરમિયાન ઓફીસમાંથી નીચે ઉતરતી વખતે તેઓ અચાનક ચક્કર આવવાથી પડી ગયા હતા.

તેમને ઉલટી થતા ઓફીસ સ્ટાફ તેમને તાત્કાલિક બાજુમાં આવેલી નિર્મલ હોસ્પિટલમાં ડો.ગૌરીશ ગડબૈલની સારવાર હેઠળ દાખલ કરવામાં આવ્યા હતા અને તેમની સારવાર શરૂ કરવામાં આવી. ત્યારબાદ નિદાન માટે CT સ્કેન કરાવતાં જાણવા મળ્યું હતું કે, મગજની નસો ફાટી જવાથી બ્રેઈન હેમરેજ થયું હતું.

ત્યારબાદ 13 મેના રોજ ન્યુરોફિજીશિયન ડૉ.સિદ્ધેશ રાજાધ્યક્ષ, પીડીયાટ્રીક ડૉ. નિર્મલ ચોરરિઆ, મેડીકલ સુપ્રીટેન્ડેન્ટ ડૉ.ગૌરીશ ગડબૈલ અને ઇન્ટેન્ટસીવીસ્ટ ડૉ.માધવી ગોંડા દ્વારા પરેશભાઈને બ્રેઈનડેડ જાહેર કરવામાં આવ્યા હતા. જેથી ડોનેટ લાઈફે અંગદાન અંગે પરેશભાઈના પુત્ર દેવાંગ તેમના જમાઈ ચિરાગ દોશી, ભાઈ પ્રકાશભાઈ શાહ, બનેવી યશવંતભાઈ શાહ સાથે ટેલીફોનીક ચર્ચા કરી અંગદાનનું મહત્વ અને તેની સમગ્ર પ્રક્રિયા સમજાવવામાં આવી હતી.