વહેલી સવારમાં તસ્કરોએ કરી મંદિરમાં ચોરી: પહેલા ભગવાનને પગે લાગ્યા અને પછી કર્યા હાથ સાફ, જુઓ CCTV

હાલમાં કોરોનાની સાથે-સાથે જ  ચોરીની ઘટનામાં પણ સતત વધારો થતો જઈ રહ્યો છે. રાત્રી કરફ્યુનો લાભ લઈને કેટલાંક તસ્કરો ધાડ પાડતાં હોય છે ત્યારે આવી જ એક ઘટના રાજ્યના બનાસકાંઠા જીલ્લામાંથી સામે આવી છે. દાંતીવાડા નજીકનાં મસાણીયા વીર મહારાજના મંદિરમાંથી એક જ મહિનામાં બીજી વખત ચોરીની ઘટના બની છે.

રાત્રિ દરમિયાન મંદિરમાંથી મૂર્તિની ચોરી કરતા એકસાથે 2 શખ્સો CCTVમાં કેદ થઇ ગયા છે. આ મામલે પોલીસ દ્વારા હવે આગળની તપાસ હાથ ધરવામાં આવી છે. મળી રહેલ જાણકારી મુજબ દાંતીવાડા નજીકના મસાણીયા વીર મહારાજના મંદિરમાંથી એક જ મહિનામાં બીજી વખત મૂર્તિની ચોરી થઇ હોવાની ઘટના સામે આવી છે.

આની પહેલા પણ મંદિરમાંથી મૂર્તિની ચોરી થયા પછી તસ્કરો મૂર્તિને મંદિરમાં પાછી મૂકી ગયા હતા. ત્યારપછી ગત મોડી રાત્રે ફરી વાર મંદિરમાંથી અજાણ્યા શખ્સોએ મસાણીયા વીર મહારાજની મૂર્તિની ચોરી કરી છે. ચોરી કરવા માટે આવેલ બંને શખ્સો CCTVમાં પણ કેદ થઈ ગયા છે.

આ મામલે દાંતીવાડા પોલીસ દ્વારા અજાણ્યા શખ્સની શોધખોળ હાથ ધરવામાં આવી છે. અહીં નોંધનીય છે કે, આ મંદિરમાં સોના જેવી દેખાતી પંચધાતુની મસાણીયા વીર મહારાજની મૂર્તિ મૂકવામાં આવી છે. જેને લીધે ઘણીવાર સોનાની મૂર્તિની અજાણ્યા તસ્કરોની ઉઠાંતરી કરી જતા હોવાનું સ્થાનિક લોકોનું જણાવવું છે.