વડોદરામાં દારુ ઘુસાડવા માટે બુટલેગરે એવો કીમિયો અપનાવ્યો કે.., પોલીસ પણ ચડી ગોટે

ગુજરાત: દારૂ (Alcohol) નું વેચાણ કરવા માટે બુટલેગર (Bootlegger) તેમજ દારૂનો જથ્થો પહોંચાડનાર ખેપિયાઓ પોલીસ (Police) થી બચવા માટે નતનવી તરકીબો અજમાવતા રહેતા હોય છે ત્યારે હવે સાયબર કાફે (Cybercafe) માં બનાવટી ઇનવોઇસ બનાવીને ટ્રાન્સપોર્ટ મારફતે મુંબઈ (Mumbai) થી દારૂ મંગાવીને વેચાણ કરવાનો વડોદરા (Vadodara) બુટલેગરનો નવો કીમિયો સામે આવ્યો છે.

2.29 લાખ ઉપરાંતની મત્તા કબજે કર્યો:
PCB પોલીસ દ્વારા ટ્રાન્સપોર્ટ ઉપરથી દારૂના જથ્થાનું પાર્સલ મેળવીને બુટલેગર સુધી પહોંચાડવા જતાં ઇકો કાર ચાલકને દારૂના જથ્થાની સાથે પકડી પાડીને નામચીન બૂટલેગરને વોન્ટેડ જાહેર કરવામાં આવ્યો છે. પોલીસ દ્વારા બિયરનો જથ્થો, મોબાઇલ ફોન તેમજ કાર મળીને 2.29 લાખ ઉપરાંતની મત્તા કબજે કરીને આરોપી તથા મુદામાલનો કબજો કારેલીબાગ પોલીસને સોંપી દેવાયો છે .

પોલીસે વોચ ગોઠવી કારને રોકી:
આગામી દિવસોમાં દિવાળી પર્વ હોવાને લીધે વિદેશી દારૂના વેચાણ ઉપર રોક કરવાના હેતુથી પોલીસ તંત્ર સજ્જ થઈ ચુક્યું છે. જેના ભાગ સ્વરૂપે પોલીસ મથકના જવાનો પેટ્રોલિંગમાં હતા. આ દરમિયાન ચોક્કસ માહિતી મળી હતી કે, કારેલીબાગ ઇન્ડસ્ટ્રીઝ એસ્ટેટ જલારામ મંદિર બહુચરાજી રોડ પરથી દારૂ ભરેલી ઇકો કાર પસાર થવાની છે કે, જેને આધારે પોલીસે વોચ ગોઠવીને ઇકો કારને અટકાવી હતી.

બનાવટી ઇનવોઇસ બનાવી ટ્રાન્સપોર્ટ મારફતે મુંબઇથી દારૂ મંગાવ્યો:
પોલીસની પ્રાથમિક પૂછપરછમાં કારચાલક મનોજ કાંતિભાઈ મારવાડી હોવાનું સામે આવ્યું હતું. આ તપાસ વખતે કારમાંથી 214 નંગ બિયર ટીનના 9 બોક્સ મળી આવ્યા હતા. આ જથ્થો મુંબઇના ઠેકા ઉપરથી પાર્સલ કરીને સાયબર કાફેમાં મૈત્રી એન્ટરપ્રાઇઝનું બિલ બનાવી આપ્યું હતું.