GST અધિકારીઓએ ગુજરાતમાં આ જગ્યાએ ઝડપ્યું 1210 કરોડનું બોગસ બિલિંગનું કૌભાંડ ઝડપ્યું

કેન્દ્રીય જીએસટીની ગાંધીનગર કચેરીના અધિકારીઓની એક ટીમે રૂા. 1210 કરોડનું બોગસ બિલિંગનું કૌભાંડ પકડી પાડ્યું છે. આ કૌભાંડ આચરનાર અહેસાસ અલિ તસવારઅલિ સૈયદની ધરપકડ પણ કરવામાં આવી છે. રૂા. 1210 કરોડના બોગસ બિલ બનાવીને અહેસાસ અલીએ રૂા. 177.64 કરોડની ઇનપુટ ટેક્સ ક્રેડિટ પણ મેળવી લીધી હોવાનું બહાર આવ્યું છે.

સીજીએસટી ગાંધીનગર કચેરીની એક અખબારી યાદીમાં જણાવવામાં આવ્યું છે કે આ કૌભાંડનો સૂત્રધાર અહેસાસ અલી છે. તેણે 66 જુદા જુદાં નામથી કંપનીઓ ખોલી હતી. આ કંપનીઓના જીએસટી રજિસ્ટ્રેશન લીધા હતા. આ રીતે તેણે રજિસ્ટ્રેશન નંબર,જીએસટીએનનો લોગ ઇન અને પાસવર્ડ મેળવી લીધા હતા.

વડોદરાના સયાજીગંજ વિસ્તારમાં રહેતો 29 વર્ષના અહેસાસ અલીએ આ તમામ નામોએ સીમકાર્ડ પણ મેળવ્યા હતા અને બેન્ક એકાઉન્ટ્સ પણ ખોલાવ્યા હતા. મધ્યસ્થીઓના માધ્યમથી તેમાં ઓનલાઈન ટ્રાન્ઝેક્શન કરવા માટેના પાસવર્ડ પણ મેળવી લીધા હતા. જેમને નામે કંપની અને બેન્ક એકાઉન્ટ ખોલાવ્યા હતા. તે વ્યક્તિઓને  તેમના નામના દસ્તાવેજોનો ઉપયોગ કરવા બદલ મહિને તેણે રૂા. 5થી 10 હજાર ચૂકવ્યા હતા.