નવસારીનો આ પટેલ પરિવાર ખેતીની આ ખાસ પદ્ધતિ દ્વારા કરી રહ્યો છે અઢળક કમાણી- અન્ય ખેડૂતોની આવક વધારવા કરે છે મદદ

નવસારી(Navsari) નજીકના અંભેટી ગામના કમલેશ પટેલ (Organic Farmer) વર્ષોથી તેમની એક એકર જમીનમાં રાસાયણિક ખેતી (Chemical farming) કરીને શેરડી ઉગાડતા હતા. 2015 સુધી, તે ખેતીમાંથી સામાન્ય નફા કરતાં પણ ઓછું કમાતા હતા અને ખેતીને ખોટનો સોદો ગણતા હતા. રાસાયણિક ખાતર અને જંતુનાશકો વિના પણ ખેતી કરી શકાય છે, તેની કલ્પના પણ તેમણે નહોતી કરી અને આ ખેતી વિશે તેમને કોઈ જ પ્રકારની માહિતી પણ ન હતી. પરંતુ તેઓનું કહેવું છે કે, સારા લોકોનો સંગાથ કે યોગ્ય જ્ઞાન, વ્યક્તિની વિચારસરણીમાં મોટું પરિવર્તન લાવી શકે છે.

કમલેશ એ જણાવ્યું કે, તેની સાથે પણ આવું જ થયું, તેનો મિત્ર જતિન તેને બળજબરીથી સુભાષ પાલેકરના ઝીરો વેસ્ટ કેમ્પમાં લઈ ગયો. ત્યારે કમલેશ કહે છે, “હું કુદરતી ખેતીમાં બિલકુલ માનતો ન હતો, મારા મિત્રે ત્રણ દિવસના કેમ્પ માટે પૈસા ચૂકવ્યા અને હું તેના કહેવા પર ત્યાં ગયો. પણ સુભાષ પાલેકર જીના શબ્દોની મારા પર જાદુઈ અસર થઈ અને ત્યારબાદ આ એક પડાવને કારણે તેમના જીવનનો ટર્નિંગ પોઈન્ટ અને સફળતાની શરૂઆત થઈ.

આ ઝીરો વેસ્ટ કેમ્પના ત્રણ દિવસ પછી, ચોથા દિવસે જ કમલેશ ગાય લઈને ઘરે પાછો ગયો અને સમગ્ર ગ્રામજનોને કહ્યું કે ‘આજથી મારા ખેતરમાં કેમિકલ નહિ આવે’ ગામના લોકો તેને ગાંડો સમજતા હતા. કમલેશ કહે છે કે જે દિવસે તેના ખેતરમાં શેરડીની લણણી થઈ તે દિવસે આખું ગામ પાક જોવા માટે આવી ગયું. એક વીઘા જમીનમાં 45 ટન શેરડી નીકળી તે જોઈને સૌને આશ્ચર્ય થયું. મળતી માહિતી અનુસાર અગાઉ કમલેશભાઈએ ક્યારેય 35 ટનથી વધુ પાક લીધો ન હતો.