પ્રેમની આવી તાલીબાની સજા કોઈને નહિ મળી હોય! યુવક-યુવતીને ઝાડ સાથે બાંધી માર્યો ઢોર માર

છોટાઉદેપુર: આજકાલ એવા ઘણા કિસ્સા સામે આવી રહ્યા છે જેમાં પ્રેમ કરવા બદલ પ્રેમી-પંખીડાને તાલીબાની સજા આપવામાં આવતી હોય છે. આ દરમિયાન, ફરીવાર છોટાઉદેપુરમાં પ્રેમ કરવાની તાલિબાની સજા આપવામાં આવી હોય તેવો વધુ એક બનાવ સામે આવ્યો છે. જેમાં પ્રેમ સંબંધ બાદ એકબીજાનું ઘર છોડીને ભાગી ગયેલા એક યુગલને પકડીને માર મારવામાં આવ્યો હતો. યુવક અને યુવતીને પકડીને એક ઝાડ સાથે બાંધી દેવામાં આવ્યા હતા. ત્યારબાદ બંનેને લાકડીથી માર મારવામાં આવ્યો હતો. આ અંગેનો વીડિયો હાલ સોશિયલ મીડિયામાં ખૂબ વાયરલ થયો છે.

મળતી માહિતી મુજબ, છોટાઉદેપુર તાલુકાના ચીલીયાવાંટ ગામ ખાતે ગઈકાલે આ બનાવ બન્યો હતો. આ મામલે રંગપુર પોલીસ મથક ખાતે નવ લોકો વિરુદ્ધ ગુનો નોંધવામાં આવ્યો છે. પોલીસ દ્વારા આ કેસમાં ગણતરીની કલાકોમાં તમામ આરોપીઓની ધરપકડ કરવામાં આવી છે.

આ બનાવ અંગેનો વીડિયો પણ વાયરલ થયો છે. જેમાં જોઈ શકાય છે કે યુવક અને યુવતીને એક ખેતરમાં ઝાડ સાથે બાંધી દેવામાં આવ્યા છે. ત્યારબાદ બે થી ત્રણ લોકો લાકડી વડે યુવક-યુવતીને ઢોર માર મારી રહ્યા છે.  એક ક્ષણે માર સહન ન થતાં યુવતી જમીન પર ઢળી પડે છે. આ દરમિયાન, યુવક અને યુવતી પીડા સહન ન થતાં બૂમો પણ પાડી રહ્યા છે.