માતાએ બાળકોની મસ્તીથી કંટાળીને આપ્યો ઠપકો અને પતિએ કરી પત્નીની હત્યા- ચાર સંતાનો થયા માતા વિહોણા

જયારે માણસનો ગુસ્સો સાતમાં આસમાને પહોચી જાય ત્યારે તે પોતાનું સંતુલન ગુમાવી દે છે અને ક્યારેક આજ આવેશમાં હત્યા પણ કરી નાખે છે. અને ગુસ્સો શાંત થયા બાદ તેમની પાસે માત્ર પસ્તાવા સિવાય કોઈ વિકલ્પ નથી હોતો. આવો જ એક કિસ્સો દાહોદમાંથી સામે આવ્યો છે જેમાં ડુમકા ખાતે પરિણીતાએ પોતાના બાળકોને મસ્તી કરવા મામલે ઠપકો આપી થપ્પડ મારતા પતિએ ઉશ્કેરાઈને માથાના ભાગે લાકડાના ફટકા મારી દેતા ચાર સંતાનની માતાનું કરુણ મોત નીપજ્યું.

મળતી માહિતી મુજબ, ડુમકાના રહેવાસી વિક્રમભાઈ ઉર્ફે લાલાભાઈ પસાયાના લગ્ન આશરે 15 વર્ષ પહેલાં દેવગઢબારીયા તાલુકાના પુવાળાની મીનાબેન સાથે થયા હતા. સુખી દામ્પત્યજીવનમાં દંપતીને ત્યાં એક પુત્રી અને ત્રણ પુત્રોએ જન્મ લીધો હતો.

જાણવા મળ્યું છે કે, ખેતી અને મજૂરી કામ કરી ગુજરાન ચલાવતા પરિવારમાં બાળકો ઘરમાં મસ્તીમાં મસ્ત હતા અને તેમના તોફાન મસ્તીથી કંટાળીને મીનાબેને બાળકોને શાંત કરવા માટે થપ્પડ મારી દેતા ઘરમાં હાજર પતિ રોષે ભરાઈ ગયા હતા. અને મીનાબેન સાથે મારપીટ કરી નજીકમાં પડેલ લાકડાના ફટકા માથાના ભાગે મારી દેતા મીનાબેનનું ઘટનાસ્થળે જ મોત નીપજ્યું હતું.