શહીદોના નામે ચૂંટણી જીતેલ સરકારે દેશની સુરક્ષા કરતા CRPF ના જવાનોના પગારમાંથી ભથ્થુ કાપ્યું

હાલની પરિસ્થિતિમાં ભારતનું અર્થતંત્ર મંદી ની ખરાબ પરિસ્થિતિ થી પસાર થઇ રહ્યું છે. આજે ઉદ્યોગજગતમાં દરેક ક્ષેત્ર મંદીનો માર સહન કરી રહ્યું છે. કરોડો લોકોએ મંદીના કારણે પોતાની રોજગારી ગુમાવી છે. તહેવારોના સમયે મંદીના કારણે લોકોએ પૂરા ઉત્સાહથી ખરીદી પણ કરી નહીં હોય. સરકાર ઉદ્યોગ જગતને મંદીના મારથી રાહત આપવા માટે પેકેજોનું વિતરણ કરી રહી છે.મંદીની અસર ફક્ત સામાન્ય માણસ પર જ નથી પડતી પરંતુ હાલ તો દેશની સુરક્ષા કરતાં જવાનો પર પણ પડી રહી છે. આર્થિક મંદી સામે જજૂમી રહેલી સરકાર પાસે દેશની સૌથી મોટી પૈરા-મિલિટ્રી ફોર્સ CRPFને ‘રેશન ભથ્થુ’ આપવા માટે પણ પૈસા નથી.

“ધ ટેલિગ્રાફ”માં ઈમરાન અહમદ સિદ્દીકીની એક રિપોર્ટમાં જણાવાયું છે કે, મોદી સરકાર પાસે દેશમાં નક્સલવાદથી પ્રભાવિત વિસ્તારો સહિત અલગ-અલગ ભાગોમાં ફરજ બજાવતા 3 લાખ કેન્દ્રીય રિઝર્વ પોલીસ ફોર્સ (CRPF)ને ભથ્થુ આપવા માટે પૈસા ખૂટી રહ્યા છે. CRPFની સેલેરીમાં દર મહિને 3,000 રૂપિયાનો “રેશન ભથ્થુ” આપવામાં આવે છે, પરંતુ આંતરિક સુત્રો અંતર્ગત સૂચન કરવામાં આવ્યું છે કે, આ વખતે પગારની સાથે “રાશન ભથ્થુ” નહી મળે.