આત્મનિર્ભર યોજના હેઠળ રાજ્ય સરકાર 2% વાર્ષિક વ્યાજે 1 લાખ સુધીની લોન આપશે, આ દસ્તાવેજો જરૂરી

કોરોના વાઈરસના સંક્રમણને અટકાવવા માટે લાગૂ કરવામાં આવેલા લૉકડાઉનના કારણે ઉભા થયેલા આર્થિક સંકટમાંથી જનતાને ઉગારવા માટે મુખ્યમંત્રી વિજય રૂપાણીએ “આત્મનિર્ભર ગુજરાત સહાયતા યોજના”ની જાહેરાત કરી છે. આ યોજના હેઠળ રાજ્યના નાના વેપારીઓ, કારીગરો અને મજૂર વર્ગના ધંધા-રોજગારને પુન:પાટા પર લાવવાના ઉદ્દેશ્યથી તેમને 2 ટકાના વાર્ષિક વ્યાજે 1 લાખ રૂપિયા સુધીની લોન આપવામાં આવશે. આ લોન માટે આજથી ફોર્મ વિતરણની શરૂઆત થઈ ગઈ છે.

ક્યાંથી મળશે ફોર્મ?

પ્રાપ્ત માહિતી મુજબ, આજથી શરૂ કરીને આગામી 31-ઓગસ્ટ સુધી લોન માટે અરજી કરી શકાશે. આ અરજી રાજ્યની અંદાજે 1 હજાર જેટલી જિલ્લા સહકારી બેંકની શાખાઓ, 1400 શહેરી સહકારી બેંક અને 7 હજારથી વધુ ક્રેડિટ સોસાયટી સહિત 9 હજાર સ્થળો પરથી કરી શકાશે. જેમાં ધોબી, નાયી, પ્લંબર, ઈલેક્ટ્રિશિયન, નાના દુકાનદાર, રિક્ષા ચાલકો જેવા વ્યવસાયકારોને લોન આપવામાં આવશે.