પોતાના સમાજમાંથી સૌપ્રથમ મહિલા પોલીસ બનનાર કર્મીનું ફરજ દરમ્યાન બીમારી થવાથી થયું અવસાન

પાલનપુર રેલવે પોલીસમાં ફરજ બજાવતાં પાલનપુરના હેબતપુર ગામના ફરહાનાબેન જાગીરદાર સમાજના પ્રથમ મહિલા પોલીસકર્મી હતા. જો કે, એક સપ્તાહ અગાઉ ફરહાનાબેનને શારિરીક બિમારી થતાં સારવાર અર્થે મહેસાણાની ખાનગી હોસ્પિટલમાં દાખલ કરાયા હતા. જેમને શુક્રવારે હોસ્પિટલમાંથી રજા અપાતા ઘરે લવાયા હતા. જો કે, શનિવારે સાંજે અગમ્ય કારણોસર તેમનું નિધન થતાં સમગ્ર જાગીરદાર સમાજમાં શોકની લાગણી પ્રસરી હતી. પોલીસ જવાનો દ્વારા ગાર્ડ ઓફ ઓનર સાથે પાર્થિવદેહને અંતિમ વિદાય અપાઇ હતી.

પાલનપુરના રેલવે પોલીસ સ્ટેશનમાં હેડ કોન્સ્ટેબલ તરીકે ફરજ  બજાવતા વડગામ તાલુકાના પાંડવા ગામના ૨૩ વર્ષીય મુસ્લિમ જાગીરદાર સમાજના પ્રથમ મહિલા પોલીસ કર્મી ફરહાનાબેન અયુબખાનના લગ્ન પાલનપુરના હેબતપુર ગામે થયેલ હતા. જાગીરદાર સમાજમાં મહિલાઓ પોતાની માન મર્યાદામાં માનતા હોવા છતાં પણ મહિલા પોલીસ કર્મી ફરહાનાબેન હાલના આધુનિક યુગમાં દીકરીઓ ભણી ગણીને આગળ આવે તે માટે સમાજની મહિલાઓને માટે પ્રેરણા પુરી પાડતા હતા.