Flash Back 2019: અબ કી બાર ફીર મોદી સરકાર

ભારતની 2019 ની લોકસભાની ચૂંટણી પૂર્વેના થોડા મહિનાઓ પહેલા ભાજપ અને વડાપ્રધાન મોદીની લોકપ્રિયતા ઠીક ઠીક ઓસરી હતી. 2014માં સત્તા મેળવવા મતદારોને જે આર્થિક વિકાસ, પારદર્શક વહીવટ અને અવનવી યોજનાઓના વચનો આપ્યા હતા, તે મહ્દઅંશે દિવાસ્વપ્ન પૂરવાર થયા હતા. અધુરામાં પૂરૂ નોટબંધી અને જીએસટીના કારમા ફટકામાંથી નાગરિકો વેપારીઓ અને ઉદ્યોગો બેઠા નહોતા થઇ શક્યા.

તેમ છતાં ભાજપ 2019માં પુન: સત્તા નહીં જ મેળવી શકે તે હદે નકારાત્મક હવા તો નહોતી જ. હા, એવી ચર્ચા જરૂર થતી હતી કે ભાજપને તેમની છબી પ્રમાણે બેઠકો નહીં મળે તો મોદીની જગ્યાએ ગડકરી જેવા નેતા પર સંઘ નજર દોડાવશે. જો કે ‘મોદી અને અમિત શાહની જોડી કા ક્યા કહેના’ ગજબનો પ્રચાર, રેલી, અખૂટ આત્મવિશ્વાસ સાથેનાં વ્યૂહાત્મક પ્રવાસો, વધુ એક વખત જનમેદની પર ભાષણોની તડાતડી અને બેઠકોની ફાળવણીમાં મેદાન મારી ગયા. વિરોધ પક્ષો એક મંચ પર ભેગા થઇને મોદી તો ના જ જોઇએ તેવા નકારાત્મક એજન્ડા સાથે તેમના જ વજન હેઠળ તૂટી પડયા.

2019 ના એપ્રિલ મે માં મતદાન હતું અને 14 ફેબુ્આરીએ જમ્મુ-શ્રીનગર હાઈવે પરના પુલવામા જિલ્લામાં આતંકવાદીઓએ ભારતીય સેનાનીઓની બસ પર હુમલો કર્યો અને 47 જવાનો શહીદ થતા દેશભરમાં સોપો પડી ગયો. પાકિસ્તાનને વળતો જવાબ આપવાનો નાગરિકોમાં રોષ ભભુકતો હતો. ત્યારે જ જોગાનુજોગ લોકસભાની ચૂંટણી પહેલા જ 26 ફેબ્રુઆરીએ પાકિસ્તાનની સરહદમાં ઘૂસી જઇને આતંકવાદીઓના બાલાકોટ સ્થિત કેમ્પ પર ભારતીય હવાઈ દળે એર સ્ટ્રાઇક કરી ખાતમો બોલાવ્યો.

દેશભરમાં મોદી અને ભાજપ નાગરિકોની નજરમાં રાષ્ટ્રીયતાની ઇમેજ સાથે હીરો બની ગયા. દેશભરમાં દેશભક્તિનું મોજું ફરી વળ્યું. અન્ય મુદ્દાઓ વિસરાઈ ગયા. ‘મોદી હૈ તો મૂમકીન હૈ’ સૂત્ર મતદારોએ વધાવી લીધું. ૨૦૧૪-૨૦૧૯માં મોદીની દેશને બદલવાની નિષ્ઠા અવિરત શ્રમ અને ભારતની આંતરરાષ્ટ્રીય છબિ સુધારવાની કવાયત તો નાગરિકોને સ્પર્શી જ હતી. તેના કરતા પણ વિશેષ કોંગ્રેસના રાહુલ ગાંધી તેની પ્રતિભાને નિખાર આપવામાં સદંતર નિષ્ફળ નીવડયા હતા. વિરોધ પક્ષો દેશની સેવા કરવા કરતા માત્ર મોદી હટાવો અને કોઈપણ ભોગે સત્તા પ્રાપ્ત કરવાની ગીધના ટોળા જેવી લૂંટણ વૃત્તિ છતી કરી ચૂક્યા હતા.