મીરાબાઈ ચાનુથી લઈને આ ખેલાડીઓએ કોમનવેલ્થમાં વધાર્યું દેશનું ગૌરવ- જાણો કુલ કેટલા મેડલ મળ્યા

બર્મિંગહામ(Birmingham)માં રમાઈ રહેલી કોમનવેલ્થ ગેમ્સ(Commonwealth Games)માં ભારતે(India) પણ મેડલનું ખાતું ખોલી નાખ્યું છે અને ખાસ વાત એ છે કે એક જ દિવસમાં ભારતીય વેઈટલિફ્ટર્સે 4 મેડલ પોતાના નામે કર્યા છે. ઓલિમ્પિક મેડલ વિજેતા સ્ટાર વેઈટલિફ્ટર મીરાબાઈ ચાનુ(Mirabai Chanu)એ ગોલ્ડ મેડલ(Gold Medal) જીત્યો હતો. આ સાથે જ અન્ય 3 મેડલ પણ વેઈટલિફ્ટિંગ(Weightlifting)માં મળ્યા છે.

ઓલિમ્પિક મેડલ વિજેતા વેઈટલિફ્ટર મીરાબાઈ ચાનુએ દેશનું નામ રોશન કર્યું અને કોમનવેલ્થ ગેમ્સ-2022માં ગોલ્ડ જીતનાર પ્રથમ ભારતીય મહિલા બની. તેણે મહિલાઓની 49 કિગ્રામાં ગોલ્ડ મેડલ જીત્યો હતો. તેણે કુલ 201 કિલો વજન ઉપાડ્યું. મીરાબાઈએ સ્નેચમાં 88 કિલો અને ક્લીન એન્ડ જર્કમાં 113 કિલો વજન ઉપાડ્યું હતું.

મીરાબાઈ ચાનુએ કોમનવેલ્થ ગેમ્સનો રેકોર્ડ પણ બનાવ્યો હતો. તેણે ગયા વર્ષે ટોક્યો ઓલિમ્પિકમાં પણ દેશનું સન્માન વધાર્યું હતું. મેજર ધ્યાનચંદ ખેલ રત્ન પુરસ્કાર અને પદ્મશ્રીથી સન્માનિત મીરાબાઈએ 49 કિગ્રામાં ટોક્યોનો સિલ્વર મેડલ જીત્યો હતો.

સંકેત સરગર આ ગેમ્સમાં મેડલ જીતનાર પ્રથમ ભારતીય બન્યો જ્યારે તેણે પુરુષોની 55 કિગ્રામાં સિલ્વર મેડલ જીત્યો. મહારાષ્ટ્રનો વતની સંકેત ફાઈનલમાં માત્ર 248 કિલો વજન જ ઉઠાવી શક્યો હતો. ક્લીન એન્ડ જર્કના ત્રીજા પ્રયાસમાં તેને નાની ઈજા થઈ હતી, જેના કારણે તે ગોલ્ડ મેડલથી ચુકી ગયો હતો. સંકેતે સ્નેચમાં 113 કિલો અને ક્લીન એન્ડ જર્કમાં 135 કિગ્રા વજન ઉપાડ્યું હતું. મલેશિયાના મોહમ્મદ અનિકે 249 કિલો વજન ઉઠાવીને મેચનો ગોલ્ડ જીત્યો હતો.