સૌરાષ્ટ્રના ખેડૂતો પર પાકના ઓછા ભાવના માર, કોરોનાનો કહેર બાદ હવે આવી તીડ ની આફત- જાણો વધુ

ગુજરાતમાં કોરોનાનો કહેર અટકવાનું નામ નથી લઇ રહ્યો ત્યારે હવે તીડની આફત આવીને ઉભી છે. અત્યાર સુધી રાજ્યના બોર્ડર વિસ્તારોમાં તીડનો આતંક હતો. હવે પહેલી વાર એવું બન્યું છે જયારે સૌરાષ્ટ્રમાં પણ તીડના ટોળા દેખાતા ખેડૂતો ચિંતામાં આવી ગયા છે.

મળતી માહિતી અનુસાર સુરેન્દ્રનગર જિલ્લામાં તીડ પહોંચી ગયા છે. અહીં લીંબડી તાલુકાના શિયાણી ગામની સીમમાં અસંખ્ય તીડનું ટોળુ આકાશમાં ફરી રહ્યું છે. જેનો વીડિયો પણ વાયરલ થયો છે. લીંબડી તાલુકાના શિયાણીમાં તીડ દેખાતા લોકોમાં કુતૂહલ સર્જાયું છે. તો લોકો સીમમાં થાળી વગાડીને બુમો પાડી તીડ ઉડાડી રહ્યા છે.

ભાવનગરના વલ્લભીપુર તાલુકાના નસીતપુર અને મોટીધરાઈ ગામે તીડ ત્રાટકયા હોવાના અહેવાલો મળી રહ્યા છે. વાડીઓમાં તીડનું ટોળું આવી ચઢતા ખેડૂતોમાં ચિંતા ફેલાઈ ગઈ છે. રાત્રિના સમયે એકાએક તીડનું ટોળું ખેતરોમાં ઉતરી આવ્યું હતું. જેથી ખેડૂતો પર મુસીબતોના વાદળ મંડરાયા છે.

અન્ય જીલ્લાની વાત કરીએ તો મોરબી જીલ્લાના હળવદ તાલુકાના સાતેક ગામમાં તીડના ઝુંડ દેખાયા છે. નવા ઇશનપુર, રણમલપુર, ધણાદ, માલણીયાદ, જુના ઇશનપુર ગામમાં તીડનો આતંક જોવા મળ્યો છે. તીડને કારણે તલ સહિતના અનેક પાકમાં ખેડુતોને નુકશાન થયા તેવી દહેશત સતાવી રહી છે. ત્યારે આ જાણ થતા જ ખેતીવાડી અધિકારીઓ તાત્કાલિક સ્થળ ઉપર દોડ્યા હતા અને તીડનો નાશ કરવા માટે રાત્રિ દરમ્યાન દવાનો છંટકાવ કરવા માટેનું તંત્રએ આયોજન કર્યું છે.