આખરે 3 વર્ષે સુરત પોલીસને મળી સફળતા: પત્નીને ભગાડી ગયેલા પ્રેમીના ભાઈની હત્યા કરનાર પતિ-દિયરની ધરપકડ

રાજ્યમાં આવેલ સુરત શહેરમાં ગુનાઓના પ્રમાણમાં સતત વધારો થતો જઈ રહ્યો છે. શહેરમાં પત્નીને ભગાડીને લઈ ગયેલા પ્રેમીના ભાઈની ક્રુરતાપુર્વક હત્યા કરીને લોખંડની આરીથી ગળાનો ભાગ ધડથી અલગ પાડી દેવાના 3 વર્ષ પહેલાં ચકચારી ઘટના બની હતી.

આ કેસમાં સંડોવાયેલા પતિ-દિયરની દિલ્હીથી ડિંડોલી પોલીસ દ્વારા ધરપકડ કરીને ગુનાનો ભેદ ઉકેલી લેવામાં સફળતા મળી છે. હત્યારાએ હત્યા કર્યા પછી મૃતદેહને કરાડવા ગામના શેરડીના ખેતરમાં ફેંકી દેતા કુતરાઓએ માથાનો ભાગ ખાઈ જતા ફક્ત ખોપડીના હાંડકા તથા માથાના વાળ જ બચ્યા હતા. અહીં નોંધનીય છે કે, હત્યા કર્યા પછી બંને ભાઈ દિલ્હી ફરાર થઈ ગયા હતા તેમજ ત્યાં કડીયા મજુરી કામ કરી રહ્યાં હતા.

જાણો શું બની હતી ઘટના?
ડિંડોલી પોલીસ સુત્રોના જણાવ્યા પ્રમાણે ગત તા 26મી ઓગસ્ટ વર્ષ 2018ના રોજ કરાડવા ગામનાં કાચા રસ્તા ઉપર ભેસ્તાન ફાટક બાજુ જઈ રહેલ રોડને અડીને આવેલ શેરડીના ખેતરમાંથી અજાણ્યા યુવકનું માથું કુતરાઓ ખાતા હોવાની જાણ પોલીસને થતાની સાથે જ પોલીસ ઘટનાસ્થળ પર પહોંચી ગઈ હતી.

તપાસ કરતા પાસેમાંથી અજાણ્યાનો મૃતદેહ મળી આવ્યો હતો. જેનુ માથુ શરીરથી અલગ હતુ. કુતરાઓ માથાનો ભાગ ખાઈ ગયા હોવાને લીધે ફક્ત ખોપડીના હાડકાં-વાળ જ બચ્યા હતા. પોલીસને શર્ટના ખીસ્સામાંથી આધાર કાર્ડ મળી આવ્યો હતો. જેના પરથી મૃતકની ઓળખ સુજય નરેશ પાસવાન તરીકે થઈ હતી. હત્યારાઓએ સુજયને છાતીના ભાગે ઘા માર્યા હતા તથા આરીથી ગળું શરીરથી અલગ કરી દીધું હતું.