કોંગ્રેસનો વિધાનસભા કુચ કાર્યક્રમ અટકાવવા સરકારની હિટલરશાહી

આજથી ગુજરાત વિધાનસભાનું ત્રણ દિવસનું સત્ર શરૂ થવાનું છે. આ સત્ર શરૂ થયા પહેલા કોંગ્રેસ દ્વારા બિનસચિવાલય મુદ્દે વિધાનસભાનો ઘેરાવ કરવા માટે વિધાનસભા કૂચનું આયોજન કરવામાં આવ્યું છે. કોંગ્રેસની વિધાનસભા કૂચની જાહેરાત બાદ વહીવટી તંત્ર અને પોલીસ તંત્ર પણ હરકતમાં આવ્યું છે અને પાટનગરમાં પોલીસનો ચાંપતો બંદોબસ્ત ગોઠવી દેવામાં આવ્યો છે.

કોંગ્રેસના આ કાર્યક્રમને અટકાવવા ગૃહવિભાગ અને રાજ્ય પોલીસ વડાએ ગાંધીનગર જિલ્લા પોલીસ વડા અને ગાંધીનગર રેન્જ આઈજી સાથે મિટિંગ કરીને જરૂરી સૂચનો કર્યા હતા અને જિલ્લાની પોલીસની સાથે મહેસાણા અને હિંમતનગર પોલીસને સ્ટેન્ડ ટુ રહેવા તાકીદ કરી છે. સાથે સાથે એસ આર પી ની એક ટીમ પણ તૈનાત કરવા સૂચન કરાયું છે.

ઓર્ડરનું પાલન કરવા રાજકોટ તરફથી આવી રહેલા તમામ વાહનો તપાસવા માટે અમદાવાદ ગ્રામ્ય પોલીસ 10 થી વધારે ટીમ કામે લાગી છે અને તે અમદાવાદ અને ગાંધીનગર તરફ આવી રહેલા લોકોની પૂછપરછ કરીને જ આગળ જવા દે છે. બીજી તરફ ચિલોડા, નાના ચિલોડા સર્કલ તપોવન સર્કલ પર પણ સઘન બંદોબસ્ત ગોઠવી દેવાયો છે. ખાસ કરીને ગાંધીનગર સરગાસણ ચાર રસ્તા પાસે અનેક વાહનો તપાસવામાં આવતા લોકોને ખૂબ જ હાલાકી પડી છે.