ટ્રેનમાં પ્રવાસ કરવો થયો મોંઘો, ભારતીય રેલવેએ કર્યો ભાવ વધારો- જાણો હવે તમારા ખિસ્સામાંથી કેટલા રુપિયા જશે

ભારતીય રેલ્વેએ પેસેન્જર ટ્રેનોના ભાડામાં વધારો કર્યો છે. રેલ્વે દ્વારા જાહેર કરાયેલા નિવેદનમાં જણાવ્યા અનુસાર ટૂંકા અંતરની ટ્રેનોનું ભાડું વધારવામાં આવ્યું છે. રેલ્વેનું ભાડુ વધારવાની પાછળનો તર્ક એ છે કે કોરોના વાયરસના જોખમને ધ્યાનમાં રાખીને ભાડામાં વધારો કરવામાં આવ્યો છે જેથી વધુ લોકો ટ્રેનોમાં બેસી ન શકે. રેલવે દ્વારા વધેલા ભાડાની અસર 30-40 કિમી સુધીના મુસાફરોને અસર કરશે.

રેલ્વે (ભારતીય રેલ્વે) એ જણાવ્યું હતું કે ભાડામાં વધારો થવાથી માત્ર 3 ટકા ટ્રેનોને અસર થશે. ભારતીય રેલ્વેએ કહ્યું કે, કોવિડ રોગચાળાની ગંભીરતા હજી યથાવત છે અને હકીકતમાં કેટલાક રાજ્યોમાં કોવિડની સ્થિતિ કથળી રહી છે. આવી સ્થિતિમાં, ટ્રેનોમાં ભીડ અટકાવવા અને કોવિડના ફેલાવાને રોકવા માટે વધેલા ભાડાને રેલ્વેના સક્રિયતા તરીકે જોવું જોઈએ. રેલ્વેના મતે, ‘પહેલાથી જ રેલવેને મુસાફર ટ્રેનની દરેક યાત્રામાં મોટું નુકસાન વેઠવું પડે છે. ટિકિટમાં ભારે સબસિડી આપવામાં આવે છે.’

ભાડુ કેટલું થશે?
રેલ્વેના જણાવ્યા અનુસાર વધેલા ભાવો સરખા અંતરથી દોડતી મેલ / એક્સપ્રેસ ટ્રેનના ભાડાના આધારે નક્કી કરવામાં આવ્યા છે. એટલે કે, હવે મુસાફરોએ ટૂંકી મુસાફરી માટે પણ મેલ / એક્સપ્રેસનું સરખું ભાડું ચૂકવવું પડશે. આવી સ્થિતિમાં હવે 30 થી 40 કિલોમીટરના પ્રવાસ કરતા મુસાફરોએ વધુ ભાડુ ચૂકવવું પડશે.

જણાવી દઈએ કે કોરોના વાયરસના ફેલાવાને રોકવા માટે ભારતીય રેલ્વેએ 22 માર્ચ 2020 ના રોજ ટ્રેનોનું સંચાલન બંધ કરવું પડ્યું હતું. ભારતીય રેલ્વે તબક્કાવાર મુસાફરોની સંખ્યામાં સતત વધારો કરી રહી છે. કોવિડના પડકારજનક સમયમાં, ભારતીય રેલ્વેએ લોકડાઉન પહેલાના સમયની તુલનામાં લગભગ 65 ટકા મેલ / એક્સપ્રેસ ટ્રેનો અને 90 ટકાથી વધુ ઉપનગરીય સેવાઓ ચલાવતું હતું.