ગુજરાતમાં દેવામાં ડૂબેલા ખેડૂતો પર મહેરબાન થયેલ કોંગ્રેસને ઇસુદાન ગઢવીએ લીધી આડેહાથ – જુઓ વિડીયો

ગુજરાત(gujarat): કોંગ્રેસના સ્થાનિક નેતાઓએ ગુજરાતના ખેડૂતો માટે લોભામણી જાહેરાતો કરી તે મુદ્દે આમ આદમી પાર્ટી ના નેશનલ જોઈન્ટ જનરલ સેક્રેટરી ઈસુદાન ગઢવી(Isudan Garhvi)એ પોતાની પ્રતિક્રિયા આપતા જણાવ્યું કે, કોંગ્રેસ ના સ્થાનિક નેતાઓ એ એવી જાહેરાત કરી છે કે, જો કોંગ્રેસની સરકાર બનશે તો ગુજરાતના ખેડૂતોને 10 કલાક વીજળી આપવામાં આવશે તથા ખેડૂતોના દેવા માફ કરવામાં આવશે. પરંતુ કોંગ્રેસ પર વિશ્વાસ કોણ કરશે? 27 વર્ષ સુધી કોંગ્રેસ ને એક તક આપી ખેડૂતોએ, છતાંય કોંગ્રેસ એ ખેડૂતો માટે શું કર્યું? ખેડૂતોની પાક વીમા કંપનીમાં કરોડો રૂપિયા ઉલેચીને ભાજપ ના મળતિયાઓ લઇ ગયા ત્યારે કોંગ્રેસ એ શું કર્યું? જ્યારે કોંગ્રેસ ના સ્થાનિક નેતાઓ આવા વચનો આપે છે, તે જ નેતાઓ કાલે ભાજપ માં નહિ હોય તેની શું ગેરંટી? મારે તેમને એ જ કહેવું છે કે ખેડૂતો ને ભ્રમિત કરવાનું રહેવા દો.

વધુમાં ઈસુદાન ગઢવીએ કહ્યું કે, કોંગ્રેસ ની બે રાજ્યોમાં સરકાર છે એક છત્તીસગઢમાં અને એક રાજસ્થાનમાં, જયારે એ કોઈ વાયદો કરતા હોય કે વચન આપતા હોય ત્યારે જોવું પડે કે તે વચન ત્યાં પૂરું કર્યું છે કે નહિ. તો મારો સવાલ એ જ છે કે કોંગ્રેસ આ બધા કામ એ રાજ્યમાં કેમ નથી કરતી જ્યાં તેમની સરકાર છે? કોંગ્રેસ એ સૌ પહેલા 10 કલાક રાજસ્થાન માં ખેડૂતોને વીજળી આપવી જોઈએ, પાવર કટ વગર એકધારી વીજળી આપવી જોઈએ, અને પેહલા તેમના દેવા માફ કરવા જોઈએ. રાજસ્થાન માં કેટલાય ખેડૂતો દેવામાં છે. તો આનો સાફ મતલબ એ જ છે કે કોંગ્રેસ જે બોલે છે તે એ કરવાની નથી અને તેની કોઈ જ ગેરંટી નથી કે આ વાયદા કરવાવાળા કોંગ્રેસના નેતાઓ આવનારા સમયમાં ભાજપ માં નહિ જાય.

2017 ની ચૂંટણી માં કોંગ્રેસ ની 78 સીટ હતી. અને 2022 આવતા આવતા હવે ફક્ત 64 સીટ બચી છે. મોટાભાગના નેતાઓ આજે ભાજપ માં જતા રહ્યા છે, તે બધા એવા જ હતા જે નિવેદનો કરતા હતા અને વચનો જ આપતા હતા. એટલે મને પૂરો વિશ્વાસ છે કે કોંગ્રેસ ના વચનો પર ખેડૂતો ભ્રમિત નહિ થાય. ખેડૂતો માટે, મહિલાઓ માટે, બેરોજગારો માટે, વેપારીઓ માટે, સામાન્ય જનતા માટે, મધ્યમ વર્ગ માટે, ગરીબો, વંચિતો, શોષિતો માટે આમ આદમી પાર્ટી ગેરંટી આપી રહી છે, કોઈ વચનો નહિ. અને જો એટલું જ હોય કોંગ્રેસ એ ખેડૂતો માટે તો પહેલા જેટલા પણ વચનો અહીંયા આપ્યા છે તે છત્તીસગઢ અને રાજસ્થાનમાં પુરા કરી બતાવે.