કાઠીયાવાડ એક્સપ્રેસ થી જાણીતા થયેલા સુરતના પેસ બોલર સેનીલ જાસોલીયાની BCCI ની વેસ્ટ ઝોન ટીમમાં પસંદગી

ભારતમાં ક્રિકેટનું સંચાલાન કરતા BCCI દ્વારા વિઝ્ઝી (VIZZY) ટ્રોફિ રમાડવામાં આવે છે. જેમાં કોલેજમાં અભ્યાસ કરતાં વિદ્યાર્થીઓમાં રહેલા ક્રિકેટના કૌશલ્યને બહાર લાવવા પ્રયત્ન કરવામાં આવે છે. ત્યારે આ ટ્રોફીમાં ઈન્ટર વેસ્ટ ઝોનની ક્રિકેટ ટીમ માટે 130 યુનિવર્સિટીમાંથી ગુજરાતના એકમાત્ર સુરતના ખેલાડી સેનીલ જાસોલીયા (Senil Jasoliya) ની પસંદગી થઈ છે. કાઠિયાવાડ એક્સપ્રેસ નામે ઓળખાતા સેનીલ જોસાલિયાની પસંદગી થતાં પરિવાર અને સાર્વજનિક યુનિવર્સિટી (Sarvajanik University) દ્વારા ગૌરવ વ્યક્ત કરવાની સાથે સાથે સારા પ્રદર્શન માટે શુભકામના આપવામાં આવી રહી છે.

સેનીલ જાસોલીયાની પસંદગી આ ટુર્નામેન્ટમાં થતા સ્થાનિક ધારાસભ્ય અને મંત્રી પ્રફુલ પાનશેરીયા એ આગામી તા. 10 થી 16 માર્ચ સુધી છત્તીસગઢના રાયપુરમાં યોજાનાર વિઝ્ઝી ટ્રોફી ટુર્નામેન્ટમાં ‘કાઠિયાવાડ એક્સપ્રેસ’ દીકરો સેનીલ ઉત્તમ પ્રદર્શન કરી રાષ્ટ્રીય સ્તરે ગુજરાતનું નામ રોશન કરે એવી શુભેચ્છા પાઠવી હતી.

વિઝ્ઝી ટુર્નામેન્ટ આગામી 10 માર્ચથી 16 માર્ચના રોજ છત્તિસગઢના રાયપુરમાં યોજવામાં આવશે. જેમાં દેશના ચારેય ઝોનની એક એક ટીમ ભાગ લેનાર છે. ત્યારે વેસ્ટ ઝોનમાંથી સમગ્ર ગુજરાતમાંથી સુરતના લેફ્ટ આર્મ પેસ બોલર એવા સેનિલકુમાર હસમુખભાઈ જાસોલિયાની પસંદગી કરવામાં આવી છે. સેનિલએ આ ટુર્નામેન્ટમાં સારા દેખાવની આશા વ્યક્ત કરી છે અને અત્યારથી જ પ્રેક્ટિસ શરૂ કરી દીધી છે.

રોજની આકરી પ્રેક્ટિસ કરે છે સાર્વજનિક યુનિવર્સિટીમાં બીકોમના પ્રથમ વર્ષમાં અભ્યાસ કરતાં સેનિલ જાસોલિયાએ જણાવ્યું હતું કે, પિતા ટેક્સટાઈલના વ્યવસાય સાથે સંકળાયેલા છે. ઘરમાંથી પૂરતો સપોર્ટ મળી રહ્યો છે. સાથે જ વિઝ્ઝી ટુર્નામેન્ટમાં પસંદગી થતાં જ લાલભાઈ ક્રિકેટ સ્ટેડિયમમાં રોજની ચારેક કલાકથી વધુની આકરી પ્રેક્ટિસ કરે છે. સાથે જ કોલેજમાં અને ખાનગી ક્લબમાં પણ બોલિંગની પ્રેક્ટિસ કરે છે.