ગુજરાતમાં કોરોનાની ચિંતાજનક સ્થિતિ: એક સાથે 8 નવજાત બાળકોનો કોરોના રીપોર્ટ આવ્યો પોઝીટીવ, તંત્ર થયું દોડતું

હાલમાં કોરોના મહામારીના દિવસેને દિવસે વધતા કેસો દરમિયાન વડોદરામાંથી ચિંતાજનક સમાચાર સામે આવી રહ્યાં છે. શહેરની એસ.એસ.જી હૉસ્પિટલમાં આઠ નવજાત બાળકોનો કોરોના રિપોર્ટ પોઝિટિવ આવ્યો છે. જેના કારણે આરોગ્ય વિભાગ દોડતું થયું છે. બાળકો માટે એસ.એસ.જી હૉસ્પિટલમાં ખાસ આઇસોલેશન વોર્ડની સુવિધા ઉભી કરવામાં આવી છે. શહેરની ખાનગી હૉસ્પિટલમાં પણ બાળકોના કેસ પોઝીટીવ નોંધાયા છે.

બાળકોના કોરોના રિપોર્ટ પોઝિટિવ આવતા એસ.એસ.જી હૉસ્પિટલમાં બાળકો માટે અલગ કોરોના વોર્ડ તૈયાર કરવામાં આવ્યો છે. આરોગ્ય વિભાગની ચિંતા એટલા માટે પણ વધી છે કે, કોરોના દરમિયાન મોટા વ્યક્તિઓ માટે જે દવાઓનો ઉપયોગ થાય છે તેનો ઉપયોગ નાના બાળકો માટે કરી શકાય નહિ.

જાણવા મળ્યું છે કે, એસએસજી પિડિયાટ્રીક વિભાગમાં આઠ બાળકો કોરોના સંક્રમિત થયા છે. જેમાંથી 5 બાળકોને હોમ ક્વોરનટાઈન કરવામાં આવ્યાં છે તેમજ ત્રણ બાળકોની હૉસ્પિટલમાં કોરોના ગાઇડલાઇન પ્રમાણે સારવાર કરવામાં આવી રહી છે. એચઓડી, ડૉ. શિલા ઐયરના જણાવ્યા અનુસાર, આ વખતના કોરોના સ્ટ્રેનમાં સંક્રમણમાં બાળકોના કોરોના ટેસ્ટ પોઝિટિવ આવી રહ્યાં છે.

માતા પિતા કોરોના પોઝિટિવ હોય તેવા બાળકો પોઝિટિવ આવી રહ્યાં છે. તેમના માટે ખાસ આઇસોલેશનની સુવિધા ઉભી કરવામાં આવી છે. વડોદરા શહેરમાં કોરોનાના કેસોમાં સતત વધારો નોંધાતા ખાનગી અને સરકારી હોસ્પિટલોમાં બેડ ભરાવવા લાગી છે.