ગુજરાત: જન્મદિનનાં દિવસે જ 12માં માળેથી ઝંપલાવીને યુવાને કૂદકો મારી મોતને કર્યું વ્હાલું  

હાલમાં ગુજરાતમાં આવેલ રાજકોટ શહેરમાંથી આત્મહત્યાની એક ઘટના સામે આવી રહી છે. રાજકોટના 150 ફૂટ રિંગ રોડ પર આવેલ શિતલ પાર્ક પાસે ‘ધ સ્પાયર’ નામના કુલ 12 માળના બિલ્ડીંગ પરથી યુવાને કૂદકો મારીને જીવન ટૂંકાવી લીધું હતું. એને ઊંચાઈનો ભય લાગતો હોવાથી ઊંધો કૂદકો મારીને મોતને વ્હાલું કર્યું હતું.

યુવાને બિલ્ડીંગ પરથી કૂદકો મારતાં એના લાઈવ દ્રશ્યો CCTVમાં કેદ થયા છે. ઘટનાની જાણ થતાની સાથે જ પોલીસ પહોંચી ગઈ હતી તેમજ 108 દ્વારા યુવાનના મૃતદેહને પોસ્ટમોર્ટમ માટે હોસ્પિટલ ખસેડવામાં આવ્યો હતો. પોલીસે આ અંગે તપાસ હાથ ધરી છે. યુવાનની માતાએ કહ્યું હતું કે, મારા દીકરાનો જન્મ અગિયારસે થયો હતો તેમજ મોત પણ આજે અગિયારસના દિવસે થયું છે. ઘર નજીક આખી રાત કૂતરા ભસતા હોવાથી યુવાનને નિંદર આવી ન હતી.

આત્મહત્યા કરવા પાછળનું કારણ અકબંધ :
યુવાને ક્યાં કારણોસર આપઘાત કર્યો તે હજુ સુધી જાણી શકાયું નથી. પોલીસે પરિવારજનોના નિવેદનો નોંધી આગળની કાર્યવાહી હાથ ધરવામાં આવી છે. CCTVમાં યુવાન કુલ 12 માળની ગેલેરીની કાચની બારીમાંથી બહાર નીકળીને પાળી પર બેસીને ઉંધો કુદકો મારતો જોવા મળી રહ્યો છે. 12માં માળેથી નીચે પટકાતા ઘટનાસ્થળ પર જ યુવાનનું મોત થયું હતું.