ગુજરાતમાં ભારે વરસાદના કારણે આ શહેરોમાં NDRFની 13 ટીમ થઇ તૈનાત

ગુજરાતમાં છેલ્લા 2 દિવસથી ભારે વરસાદના કારણે નદી નાળા છલકાઈ ઉઠ્યા છે ત્યારે સૌરાષ્ટમાં છેલ્લા 5 દિવસથી સતત વરસાદ વરસી રહ્યો છે જેના કારણે ઘણા બધા વિસ્તારોમાં પાણી ભરાયા છે. ત્યારે રાજ્યમાં વરસાદનું જોર વધતા NDRFની ટીમને તૈનાત કરવામાં આવી છે. રાજ્યમાં 13 જેટલી ટીમને વિવિધ જિલ્લાોમાં તૈનાત કરાઈ છે. ઉલ્લેખનીય છે કે NDRFની બે ટીમને ગાંધીનગર અને વડોદરા રિઝર્વ રખાઈ છે.

NDRFની 13 ટીમને તૈનાત કરવામાં આવી
હાલમાં ગુજરાત રાજ્યમાં ભારે વરસાદના કારણે NDRF ની 13 ટીમો રાજ્યનાં અલગ અલગ સ્થળો પર તૈનાત કરવામાં આવી છે. હવામાન વિભાગની આગાહીને પગલે 14 એનડીઆરએફની ટીમોને અલગ અલગ જિલ્લામાં સ્ટેન્ડ ટુ કરાઈ છે. ગુજરાતમાં 21 ઓગસ્ટ સુધી ભારે વરસાદની આગાહી કરવામાં આવી છે. જેને પગલે કચ્છ, બનાસકાંઠા, પાટણ, મોરબી, જામનગર, દેવભૂમિ દ્વારકા, ગાંધીનગર, પોરબંદર, ગીર સોમનાથ, અમરેલી, ભાવનગર, સુરત, વલસાડ, નવસારી જિલ્લાઓમાં એનડીઆરએફની ટુકડી તૈનાત કરાઈ છે. સાથે જ વડોદરા હેડ ક્વાર્ટર પર પણ એક ટીમ તૈનાત રહેશે.

ગુજરાત હવામાન વિભાગના જણાવ્યા અનુસાર, રાજ્યમાં 232 તાલુકામાં વરસાદ નોંધાયો છે. જેમા સૌથી વધુ જાંબુઘોડામાં 8 ઇંચ જેટલો વરસાદ નોંધાયો છે. તો ડેડિયાપાડામાં સવા 7 ઇંચ, માંડવીમાં 6.6 ઇંચ, સોનગઢમાં 6.5 ઇંચ, પારડીમાં 6.5 ઇંચ, ગણદેવીમાં 6 ઇંચ, વ્યારામાં 5.5 ઇંચ, વાલોદમાં સવા 5 ઇંચ, અંકલેશ્વરમાં સવા 5 ઇંચ, વાંસદામાં 5 ઇંચ, ચીખલીમાં 5 ઇંચ, સિદ્ધપુરમાં પોણા 5 ઇંચ અને વઘઈમાં પણ પોણા 5 ઇંચ વરસાદ વરસ્યો છે.