નવસારી અક્સ્માતનો લાઈવ વિડીયો: પૂરપાટ ઝડપે આવતી કારની ટક્કર લાગતા બાપ દીકરી ફંગોળાયા- દીકરીની કમકમાટી ભર્યું મોત

નવસારી(ગુજરાત): રોજે રોજ માર્ગ અકસ્માતની ઘટનાઓ બનતી હોય છે ત્યારે વધુ એક કમકમાટી ભરી અકસ્માતની ઘટના થોડા દિવસ પહેલા નવસારીમાં બની હતી. આ અકસ્માતના સીસીટીવી ફૂટેજ સામે આવ્યા છે. આ વીડિયો જોઈને ભલભલાના રુંવાડા ઊંભા થઈ જાય છે. નેશનલ હાઇવે 48 પર ફૂલ સ્પીડે જતી કારે આગળની કારને અડફેટે લીધી હતી. કારની ટક્કરથી બીજી કાર બેકાબુ બનીને મોપેડ ઉપર જતા પિતા પુત્રીને અડફેટે લીધા હતા. સારવાર દરમિયાન ગંભીર રીતે ઘાયલ પુત્રીનું મોત નીપજ્યું હતું.

સૂત્ર દ્રારા જાણવા મળ્યું છે કે, નવસારીમાં આવેલા નેશનલ હાઈવે 48 ઉપર ગ્રીડ નજીક આશરે 10 દિવસ પહેલા એક અકસ્માત સર્જાયો હતો. અહીં એક પિતા પુત્રી હોટલમા જમવા ગયા હતા. ત્યારબાદ પોતાના મોપેડ ઉપર ઘરે જઈ રહ્યા હતા. તેઓ હાઈવે ઉપરથી પસાર થઈ રહ્યા હતા. આ સમયે તેમને અકસ્માત નડ્યો હતો. મોપેડ ઉપર પિતા પુત્રી આરામથી જઈ રહ્યા હતા ત્યારે એક બેકાબુ કારે તેમને અડફેટે લીધા હતા અને બંને પિતા પુત્રી મોપેડ સાથે ફંગોળાયા હતા. તેમાં પુત્રી રોડ ઉપર જ પટકાઈ હતી. જેથી તેને ગંભીર ઈજાઓ પહોંચી હતી. બંનને સારવાર માટે હોસ્પિટલ ખસેડાયા હતા.

પ્રાપ્ત માહિતી અનુસાર, 10 દિવસની લાંબી સારવાર બાદ યુવતીનું મોત થયું હતું. પોલીસે ઘટનાના સીસીટીવીના આધારે કાર ચાલક વિરુદ્ધ ગુનો નોંધીને તેની શોધખોળ શરુ કરી હતી. પિતા સાથેનું હોટલનું ભોજન પુત્રી માટે અંતિમ બન્યું હતું.