પેટ્રોલ-ડીઝલના ભાવમાં આજે ફરી આવ્યો જબરદસ્ત ઉછાળો, જાણી લો હવે કેટલી કિંમત ચુકવવી પડશે

સાઉદી અરામકોના તેલના કુવા પર થયેલા ડ્રોન હુમલાની સીધી અસર પેટ્રોલ-ડીઝલની કિંમત પર જોવા મળી રહી છે. આજે મંગળવારે પણ રાષ્ટ્રીય રાજધાની સહિત દેશના અનેક મહાનગરોમાં પેટ્રોલ અને ડીઝલના ભાવમાં જબરદસ્ત ઉછાળો આવ્યો છે. પેટ્રોલનો ભાવ એક વર્ષ કરતાં પણ લાંબા સમયમાં પહેલી વખત ₹75ને સ્પર્શ્યો છે. PSU ઓઇલ માર્કેટિંગ કંપનીઓના જણાવ્યા અનુસાર સોમવારે પેટ્રોલના ભાવમાં 5 પૈસા અને ડીઝલના ભાવમાં 10 પૈસાનો વધારો નોંધાયો હતો.

પેટ્રોલ-ડીઝલની કિંમતમાં બે દિવસથી ચાલી રહેલી નરમાઇનો દૌર સોમવારે તૂટી ગયો અને ભાવમાં ફરી તેજી નોંધાઇ હતી. સાઉદી અરામકોના બે પ્લાન્ટ પર ગત થોડા દિવસો પહેલાં થયેલા ડ્રોન હુમલા બાદ એશિયાઇ બજાર સાથે ઘરેલૂ બજારમાં પણ પેટ્રોલ-ડીઝલના ભાવમાં ઉથલ-પાથલ જોવા મળી રહી છે. સોમવારે સવારે દેશના ચાર મહાનગરોમાં પેટ્રોલ-ડીઝલના ભાવમાં તેજી જોવા મળી. સોમવારે સવારે દિલ્હીમાં પેટ્રોલ અને ડીઝલના ભાવમાં 9-9 પૈસાની તેજી આવી હતી.

આ સાથે જ દિલ્હીમાં સોમવારે પેટ્રોલ 74.42 રૂપિયા પ્રતિ લીટર થઇ ગયું. ડીઝલમાં પણ 9 પૈસા વધીને 67.33 રૂપિયા પ્રતિ લીટર થઇ ગયું. કલકત્તા, મુંબઇ અને ચેન્નઇમાં પેટ્રોલ ક્રમશ: 77.10 રૂપિયા, 80.08 રૂપિયા અને 77.37 રૂપિયાના સ્તર પર રહ્યું હતું. તો બીજી તરફ ડીઝલન ભાવમાં ક્રમશ: 69.75 રૂપિયા, 70.64 રૂપિયા અને 71.20 રૂપિયાના સ્તર પર જોવા મળ્યું હતું. જાણકારોનું કહેવું છે કે હાલ ક્રૂડના ભાવમાં સ્થિરતા જળવાઇ રહેવાની આશા છે.