શું છે ટેલીપ્રોમ્પટર? જેના લીધે ઉડી રહી છે પ્રધાનમંત્રી મોદીની મજાક

વડા પ્રધાન નરેન્દ્ર મોદીએ(PM Narendra Modi) સોમવારે વર્લ્ડ ઇકોનોમિક ફોરમની દાવોસ એજન્ડા સમિટમાં ભાગ લીધો હતો. આ એક વર્ચ્યુઅલ સમિટ હતી, જેમાં પીએમ મોદીએ કોઈ સમસ્યાને કારણે તેમનું સંબોધન અટકાવવું પડ્યું હતું. આ સમિટનો એક વીડિયો સોશિયલ મીડિયા પર શેર કરવામાં આવી રહ્યો છે. આ વીડિયો ક્લિપ વિશે દાવો કરવામાં આવી રહ્યો છે કે ટેલિપ્રોમ્પ્ટરમાં(Teleprompter) સમસ્યાના કારણે વડાપ્રધાને તેમનું સંબોધન રોકવું પડ્યું હતું.

જોકે, સત્તાવાર રીતે આ સમસ્યા અંગે કોઈ નિવેદન આવ્યું નથી, પરંતુ વિપક્ષ તેને ટેલિપ્રોમ્પટરની સમસ્યા ગણાવી રહ્યો છે. જ્યારે ભાજપના નેતાઓનો દાવો છે કે આ ટેકનિકલ ખામી વર્લ્ડ ઈકોનોમિક ફોરમની હતી. રાહુલ ગાંધીએ આ વીડિયો પર લખ્યું છે કે, ટેલિપ્રોમ્પ્ટર પણ આવું જૂઠ સહન ન કરી શકે.

શું છે ટેલિપ્રોમ્પ્ટર?
ટેલિપ્રોમ્પ્ટરને ઓટોક્યુ તરીકે પણ ઓળખવામાં આવે છે. તે એક ડિસ્પ્લે ડિવાઇસ છે, જે વ્યક્તિને સ્પીચ અથવા સ્ક્રિપ્ટ વાંચવામાં મદદ કરે છે. ઉદાહરણ તરીકે, તેનો ઉપયોગ ટેલિવિઝન રૂમમાં થાય છે. આ સ્ક્રીન વિડિયો કેમેરાની થોડી નીચે છે, જેના પર પ્રસ્તુતકર્તા તેની સ્ક્રિપ્ટ અથવા ભાષણ વાંચે છે. જો કે, વડાપ્રધાન અને અન્ય વરિષ્ઠ નેતાઓ દ્વારા ઉપયોગમાં લેવાતું ટેલિપ્રોમ્પ્ટર થોડું અલગ છે.

શું તમે ક્યારેય લાલ કિલ્લા પરથી વડાપ્રધાનનું સંબોધન સાંભળ્યું છે? જો તમે નોંધ્યું હોય, તો પીએમની આસપાસ કાચની પેનલ દેખાય છે. ઘણા લોકો તેને બુલેટ પ્રૂફ ગ્લાસ માને છે, જ્યારે વાસ્તવમાં તે ટેલિપ્રોમ્પ્ટર છે.