ગરીબો બની રહ્યા છે બેરોજગાર અને અમીરોની તિજોરી રોકડથી છલકાય છે… આવો તે કેવો કોરોના!

કોર્નાની બીજી લહેરે સમગ્ર વિશ્વમાં કાળો કહેર વર્તાવ્યો હતો. અનેક લોકોના જીવ લીધા હતા. આ ઉપરાંત કોરોના સમયગાળા દરમિયાન ગરીબ વધુ ગરીબ બની ગયો છે. સેન્ટર ફોર મોનિટરિંગ ઈન્ડિયન ઇકોનોમીના તાજેતરના અહેવાલ અનુસાર, કોરોનાની બીજી લહેરમાં લગભગ 12 કરોડ લોકોએ તેમની નોકરી ગુમાવી દીધી હતી. અહેવાલમાં જણાવ્યા મુજબ, ગયા વર્ષે મહામારી શરૂ થઇ ત્યારથી અત્યાર સુધીમાં 97 ટકા પરિવારોની આવક ઓછી થઈ છે.

કોરોનાની સૌથી મોટી અસર દેશના ગરીબ લોકો પર પડી છે. એવા લોકો જે રસ્તાઓ પર લારી-ગલ્લા લગાવીને પોતાનું ગુજરાન ચલાવતા હતા, તેમનું જીવન મુશ્કેલ બન્યું હતું. પરંતુ, બીજી તરફ ધનિકોની સંપત્તિમાં અનેકગણો વધારો નોંધાયો છે. માત્ર ભારતમાં જ નહીં, વિશ્વના મોટા દેશોમાં અબજોપતિઓની સંપત્તિમાં ઝડપથી વૃદ્ધિ થઈ છે.

જો ફક્ત અમેરિકાની વાત કરીએ તો 651 અમેરિકન અબજોપતિની સંપત્તિ 30 ટકા વધીને 4 ટ્રિલિયન ડોલર થઈ ગઈ છે. જ્યારે વિકાસશીલ દેશોમાં, 250 મિલિયન લોકોને અત્યંત ગરીબીનો સામનો કરવો પડી શકે છે અને વિશ્વની લગભગ અડધી વર્કફોર્સે પોતાની આજીવિકાનું સાધન ગુમાવ્યું.

એક બાજુ જ્યાં કોરોનામાં સામાન્ય લોકોની મુશ્કેલીઓ વધી રહી છે. ત્યાં બીજી બાજુ વિશ્વના અબજોપતિઓની સંપત્તિમાં તીવ્ર વધારો જોવા મળ્યો છે. એમેઝોનના જેફ બેસોઝ અથવા ટેસ્લાના એલોન મસ્ક કોરોનામાં સમૃદ્ધ બન્યા, જ્યારે ભારતના અબજોપતિ ઉદ્યોગપતિઓની વાત કરીએ તો ગૌતમ અદાણીએ કોરોનામાં કમાણીના નવા રેકોર્ડ બનાવ્યા છે.