રાજ્યસભાએ સસ્પેન્ડ કરેલા સાંસદોના ધરણા ખતમ, હવે કરશે મોટું…

રાજ્યસભાના સસ્પેન્ડ કરાયેલા તમામ આઠ સાંસદોએ તેમનું ધરણાનો વિરોધ સમાપ્ત કર્યો છે. આ સાથે કોંગ્રેસે સમગ્ર ચોમાસુ સત્રનો બહિષ્કાર કરવાની જાહેરાત કરી હતી. કોંગ્રેસના રાજ્યસભાના સભ્યો રાજ્યસભામાંથી નીકળી ગયા છે. કોંગ્રેસ ઉપરાંત સમાજવાદી પાર્ટી (સપા), રાષ્ટ્રવાદી કોંગ્રેસ પાર્ટી (NCP), ડીએમકે, તૃણમૂલ કોંગ્રેસ (TMC), આમ આદમી પાર્ટી (APP), ડાબેરી, આરજેડી, ટીઆરએસ અને બસપાએ કાર્યવાહીનો બહિષ્કાર કર્યો છે. હકીકતમાં, 20 સપ્ટેમ્બરના રોજ, ખેડૂતો સાથે સંબંધિત બિલ પસાર કરતી વખતે, આ સાંસદોએ હંગામો મચાવ્યો હતો. આ પછી, સોમવારે અધ્યક્ષ વેંકૈયા નાયડુએ આઠ સત્ર માટે આઠ સાંસદોને સસ્પેન્ડ કર્યા હતા. આ પછી સંસદ સંકુલમાં જ તમામ સાંસદો ધરણા પર બેઠા હતા.

સ્પીકર વેંકૈયા નાયડુએ ડેરેક ઓ બ્રાયન અને તૃણમૂલ કોંગ્રેસના ડોલા સેન, કોંગ્રેસના રાજીવ સાતવ, રિપૂન બોરા, નાસિર હુસેન, આમ આદમી પાર્ટીના સંજયસિંહ, કે.કે. રાગેશ અને સીપીઆઈ-એમના ઇ. કરીમને સમગ્ર સત્ર માટે સસ્પેન્ડ કરવામાં આવ્યા છે. વિરોધમાં તમામ સાંસદો ગાંધી પ્રતિમા પાસે ધરણા પર હતા અને સંસદ સંકુલમાં આખી રાત વિતાવી હતી. આજે સવારે રાજ્યસભાની કાર્યવાહી શરૂ થતાં જ કોંગ્રેસે આ મુદ્દો ઉઠાવ્યો હતો. કોંગ્રેસના સાંસદ ગુલામ નબી આઝાદે જણાવ્યું હતું કે જ્યાં સુધી અમારા સાંસદોનું સસ્પેન્શન પાછું ખેંચવામાં નહીં આવે અને ખેડૂત બિલ સંબંધિત અમારી માંગણીઓ ધ્યાનમાં લેવામાં નહીં આવે ત્યાં સુધી વિપક્ષોએ સત્રમાંથી બહિષ્કાર કર્યો છે.

આ પછી, સમાજવાદી પાર્ટીના સાંસદ રામ ગોપાલ યાદવે કહ્યું કે, મેં સાંસદોને ગૃહમાં પાછા ફરવાની માંગ કરી જ નહીં પરંતુ મેં વિપક્ષ વતી માફી પણ માંગી, પરંતુ મારી માફીના બદલામાં કોઈ પ્રતિક્રિયા આપવામાં આવી નથી. આનાથી હું ખૂબ જ અસ્વસ્થ થઈ ગયો. આથી જ હું અને મારી આખી પાર્ટી સંસદના આ આખા સત્રનો બહિષ્કાર કરી રહ્યા છીએ.