કચરામાંથી વધ્યું ઘટ્યું ખાતા બાળકોને જોઈ આ વ્યક્તિએ શરુ કરી આ અનોખી પહેલ, આજે કેટલાય બાળકો…

તમામ લોકો જાણે છે કે, આપણો દેશ હજુ સંપૂર્ણપણે કુપોષણથી મુક્ત થયો નથી. આજે પણ, દેશના કેટલાંક વિસ્તારોમાં બાળકો તથા પુખ્ત વયના લોકોને દિવસમાં કુલ 2 વખત ખાવાનું મળે છે. દેશમાં ઘણા લોકો એવા છે કે, જે ગરીબ લોકો માટે મફત કે સસ્તા પૌષ્ટિક ખોરાકની વ્યવસ્થા કરે છે.

13 એપ્રિલ વર્ષ 2018ના રોજ, ગુરુગ્રામના “પંકજ ગુપ્તા” એની દુકાન જવાં માટે ઘરેથી નીકળ્યા હતા ત્યારે એમણે રોડ પર કચરાના ઢગલામાંથી ખોરાક વીણીને ખાતા બાળકોને જોયા. બાળકોની આવી પરિસ્થિતિ જોઈને પંકજે જાતે જ કંઈક જુદું તથા અસરકારક કરવાનું નક્કી કર્યું અને તેણે બીજા દિવસે એટલે કે, 14 એપ્રિલ વર્ષ 2018નાં રોજ ગુરુગ્રામમાં દેવદૂત ફૂડ બેંક સંસ્થાની શરૂઆત કરી. 

શરૂઆતનાં દિવસોમાં, પંકજની આ પહેલને લોકોએ ધ્યાનમાં લીધી ન હતી તથા લોકો એમના કાર્યની મજાક પણ ઉડાવી રહ્યા હતા. શરૂઆતના દિવસોમાં, રસોઈયાઓ દ્વારા ખોરાક તૈયાર કરવામાં આવતો હતો. તેમણે નક્કી કર્યું હતું કે, બાળકોને મફત ખોરાક આપવામાં આવશે, જ્યારે પુખ્ત વયના લોકો પાસેથી ખાવા માટે ખુબ ઓછા પૈસા લેવામાં આવશે, જેને લીધે તમામ ગરીબ લોકોને આ સુવિધાનો લાભ મળી શકે.

આ સંસ્થા લોકોને ફક્ત 5 રૂપિયામાં ભોજન પૂરું પાડી રહી છે. પંકજ મોંઘવારીના સમયમાં પણ ખુબ ઓછા પૈસામાં ભોજનનું વિતરણ કરવા અંગે કહે છે. એમનો ધ્યેય રૂપિયા કમાવવાનો નથી પણ આર્થિક રીતે નબળા લોકોને ખોરાક આપવાનો છે. આ પહેલની શરૂઆતની સાથે જ પંકજે માત્ર 1 દિવસમાં કુલ 100 લોકોને ભોજન પુરૂ પાડવાનો લક્ષ્યાંક બનાવ્યો હતો પરંતુ હાલમાં એ રોજ કુલ 500 થી વધારે લોકોને ભોજન પૂરું પાડે છે.