લાંબા સમય પછી તારક મહેતા શોમાં પરત ફરશે દયાભાભી- આવ્યા આ ખુશીના સમાચાર

આપને સૌ જાણીએ છીએ કે,’તારક મહેતા કા ઉલ્ટા ચશ્મા’માં છેલ્લાં ત્રણ વર્ષથી દયાભાભી એટલે કે દિશા વાકાણી જોવા મળી નથી. છેલ્લાં ઘણાં સમયથી ચર્ચા થઈ રહી છે કે, દિશા વાકાણી પરત આવે છે પરંતુ છેલ્લી ઘડીએ કોઈક કારણોસર તે શોમાં પરત આવી નથી. જોકે, હાલના જ એક એપિસોડમાં દિશા વાકાણી પરત આવશે, તેવો સંકેત આપવામાં આવ્યો છે.

હાલમાં જ એક એપિસોડમાં દયાભાભીનો ભાઈ સુંદર અમદાવાદથી મુંબઈ આવે છે. સુંદર દ્વારા પોતાના જીજાજી જેઠાલાલને દયાભાભીનો પત્ર આપવામાં આવે છે. આટલું જ નહીં સુંદર એમ પણ કહે છે કે, તેની બહેન એટલે કે દયા ટૂંક સમયમાં જ અમદાવાદથી મુંબઈ આવશે.

એક ચર્ચા એવી પણ થઇ છે કે, કોરોનાને કારણે દિશા વાકાણી શોમાં પરત આવ્યા નથી. દિશા વાકાણીની દીકરી સ્તુતિ નાની હોવાથી તેમણે ઘરે રહેવાનું પસંદ કર્યું હતું. જોકે, હવે ન્યૂ નોર્મલ સાથે જીવન ફરી પાટે ચઢી રહ્યું છે. ત્યારે દિશા વાકાણીએ શોમાં પરત આવવાનું વિચાર્યું હોય તેમ લાગે છે.

જાણવા મળ્યું છે કે, સિરિયલમાં દયાભાભીની ગ્રાન્ડ એન્ટ્રી બતાવવામાં આવશે. માનવામાં આવે છે કે, મેકર્સે દયાભાભી પર જ સિરિયલનો આખો ટ્રેક નક્કી કર્યો છે અને તેમનું ભવ્ય સ્વાગત થશે. દિશા વાકાણીએ પ્રોડ્યૂસરની શરતો પર કામ કરવાની ના પાડી ત્યારે આસિત મોદી દ્વારા એપ્રિલ, 2019માં દયાભાભીના રોલમાં નવી એક્ટ્રેસ આવશે અને તેના ઓડિશન શરૂ થઈ ગયા હોવાની જાહેરાત કરવામાં આવી હતી. દયાભાભીના પાત્ર માટે ઓડિશન પણ શરૂ કરવામાં આવ્યા હતાં. જોકે, ઓડિશનમાં એક પણ એક્ટ્રેસિસ ફાઈનલ કરવામાં આવી નહોતી.