આ ખેલાડીઓ સાથે વર્લ્ડ ટેસ્ટ ચેમ્પિયનશિપમાં ઉતરશે ટીમ ઇન્ડિયા- જાણો કોને જગ્યા મળી અને કોનું પત્તું કપાયું

બીસીસીઆઈએ વર્લ્ડ ટેસ્ટ ચેમ્પિયનશિપ (WTC) ની ફાઇનલ અને ઇંગ્લેન્ડ સામેની ટેસ્ટ સિરીઝ માટે ટીમ ઈન્ડિયાની જાહેરાત કરી છે. સ્ટાર ઓલરાઉન્ડર રવિન્દ્ર જાડેજા 20 ખેલાડીઓની ટીમમાં પાછો ફર્યો છે. આ સાથે સાથે હાર્દિક પંડ્યા અને કુલદીપ યાદવ ટીમમાં સ્થાન બનાવવામાં નિષ્ફળ સાબિત થયા છે.

કેએલ રાહુલને એપેન્ડિક્સનું ઓપરેશન અને કોરોનાથી સંક્રમિત વૃદ્ધિમાન સહાને પણ ટીમમાં સ્થાન આપવામાં આવ્યું છે જો કે તેઓ ત્યાં સુધીમાં સંપૂર્ણ રીતે ફીટ થઇ જશે. ટીમમાં ચાર ઓપનર, ચાર મધ્ય ક્રમના બેટ્સમેન, છ પેસરો, ચાર સ્પિનરો અને બે વિકેટકીપર સાથે ટીમ ઇન્ડિયા મેદાન પર ઉતારવાની છે.

શુક્રવારે બીસીસીઆઈની વરિષ્ઠ પસંદગી સમિતિ દ્વારા ટીમની ઘોષણા કરવામાં આવી હતી. વર્લ્ડ ટેસ્ટ ચેમ્પિયનશીપની ફાઇનલ 18 થી 22 જૂન દરમિયાન સાઉધમ્પ્ટનમાં યોજાશે અને તે પછી 4 ઓગસ્ટથી 14 સપ્ટેમ્બર સુધી ભારત અને ઇંગ્લેન્ડ વચ્ચે પાંચ મેચની ટેસ્ટ શ્રેણી રમાશે.

ભારત અને ઇંગ્લેન્ડ વચ્ચે પાંચ મેચની ટેસ્ટ સિરીઝ 4 ઓગસ્ટથી નોટિંગહામમાં શરૂ થશે. બીજી ટેસ્ટ મેચ 12 ઓગસ્ટથી લોર્ડ્સના ઈતિહાસિક મેદાન પર રમાશે. ત્રીજી ટેસ્ટ મેચ 25 ઓગસ્ટે લીડ્સમાં યોજાશે. ચોથી ટેસ્ટ 2 સપ્ટેમ્બરથી લંડનના ઓવલ ગ્રાઉન્ડ માં થશે. અને પાંચમી અને છેલ્લી ટેસ્ટ મેચ 10 સપ્ટેમ્બરથી માન્ચેસ્ટરમાં થશે.