વિરાટ કોહલીએ કર્યો સૌથી મોટો ખુલાસો- કહ્યું કે, હું કેપ્ટનશીપ કરવા માંગતો હતો પરંતુ….

ભારતીય ટેસ્ટ ટીમના સુકાની વિરાટ કોહલી(Virat Kohli)એ વન-ડેના સુકાનીપદેથી હટાવ્યા બાદ પ્રથમ વખત પ્રેસ કોન્ફરન્સ કરી હતી. તેણે કહ્યું કે તે રોહિત શર્મા(Rohit Sharma)ના નેતૃત્વમાં દક્ષિણ આફ્રિકા(South Africa)ના આગામી પ્રવાસ પર વનડે શ્રેણી રમવા માટે ઉપલબ્ધ રહેશે. ભારતીય ટીમ 16 ડિસેમ્બરે સાઉથ આફ્રિકા જવા રવાના થશે, જ્યાં તેને 3 ટેસ્ટ અને 3 વન-ડેની સીરિઝ રમવાની છે. ટેસ્ટ શ્રેણી 26 ડિસેમ્બરથી શરૂ થશે. રોહિત શર્મા ઈજાના કારણે ટેસ્ટ શ્રેણીમાંથી બહાર થઈ ગયો હતો.

જ્યારે કોહલીને પૂછવામાં આવ્યું કે શું તે ODI શ્રેણીમાંથી બહાર થઈ જશે, તો તેણે જવાબ આપ્યો, “હું પસંદગી માટે ઉપલબ્ધ છું. તમારે આ પ્રશ્ન ન પૂછવો જોઈએ. તમારે આ લોકોને પૂછવું જોઈએ કે જેઓ આ અને તેમના સુત્રો જણાવી રહ્યા છે. જ્યાં સુધી મારો સવાલ છે, હું પસંદગી માટે હંમેશા ઉપલબ્ધ છું. ભૂતકાળથી મારા વિશે જે પણ કહેવામાં આવી રહ્યું છે તે બિલકુલ વિશ્વાસપાત્ર નથી. હું ODI માટે ઉપલબ્ધ છું અને હું હંમેશા રમવા માટે ઉત્સુક હતો.”

કોહલીએ કહ્યું કે, મેં બીસીસીઆઈને આરામ માટે કહ્યું નથી. મારી અને રોહિત વચ્ચે કોઈ સમસ્યા નથી, હું બે વર્ષથી સ્પષ્ટતા કરી રહ્યો છું. હવે હું થાકી ગયો છું. વન-ડે ટીમના સુકાનીપદેથી હટાવવા પર કોહલીએ કહ્યું કે, ટેસ્ટ ટીમ અંગે ચર્ચા કર્યા બાદ મુખ્ય પસંદગીકારે મને કહ્યું કે હું ODI ટીમનો કેપ્ટન નહીં રહી શકું. તેણે કહ્યું કે, દક્ષિણ આફ્રિકા સામેની ટેસ્ટ શ્રેણી દરમિયાન રોહિત શર્માની કુશળતાની ખૂબ જ ખોટ થશે. ભારતના મર્યાદિત ઓવરોના કેપ્ટન તરીકેના તેમના કાર્યકાળ પર, કોહલીએ કહ્યું, “હું મારી જવાબદારીઓ પ્રત્યે પ્રમાણિક રહ્યો છું.”

આ સિવાય કોહલીએ કહ્યું કે રોહિત શર્માની ગેરહાજરીમાં મયંક અગ્રવાલ ઓપનિંગ કરશે. બીજો ઓપનર કેએલ રાહુલ હશે.