ચાલુ વરઘોડે વરરાજો બેસી ગયો અનશન પર અને કરી આવી માંગણી….

ઉત્તરપ્રદેશના મહોબા જિલ્લામાં બેન્ડ વાજા સાથે જતા વરરાજા ભૂખ હડતાલ પર બેસી ગયા હતા. આ નજારો જોઇને જાનૈયાઓ અને રસ્તા પરથી પસાર થતા લોકો ચોંકી ગયા. તમને પણ આ સાંભળીને આશ્ચર્ય થશે, પરંતુ શહેરના અલ્હા ચોક ખાતે મેડિકલ કોલેજની માંગણી સાથે ચાલી રહેલી ભૂખ હડતાલ દરમિયાન જાન રસ્તા પરથી પસાર થતાં વરરાજો ઘોડા પરથી ઉતરી ગયો હતો અને ઉપવાસ પર બેઠેલા લોકો સાથે બેસી ગયો હતો અને મેડિકલ કોલેજને લઈને તેણે અવાજ ઉઠાવ્યો હતો.

શહેરનાં આલ્હા ચોકમાં સત્યમેવ જયતેનાં પ્રદેશ અધ્યક્ષ વિકાસ કુમારનાં નેતૃત્વમાં 10 દિવસથી જીલ્લામાં મેડિકલ કોલેજની માંગને લઈને અનિશ્ચિતકાળના ઉપવાસ ચાલી રહ્યા છે. રવિવારની સાંજે અડધા ડઝન કરતાં વધારે પદાધિકારીઓ અનશન પર બેઠા હતા.

ત્યારે ગ્રામ કુરારાથી મહોબા આવેલી જાનમાં સામેલ જાનૈયાઓ બેંડબાજાની ધૂન પર નાચતા જઈ રહ્યા હતા. જેવી વરરાજા અરવિંદની નજર મેડિકલ કોલેજની માંગને લઈને ચાલી રહેલાં અનશનના બેનર તેમજ ઉપવાસીઓ ઉપર પડી તો તે ઘોડા ઉપરથી ઉતરીને ઉપવાસના સ્થળ પર બેસી ગયો હતો.