મુસ્લિમ યુવકનો જીવ બચાવવા હિંદુ યુવકે પોતાના પ્રાણની આહુતિ આપી દીધી- ‘ઓમ શાંતિ’

કચ્છ(ગુજરાત): હાલમાં દેશના કેટલાક ભાગોમાં હિન્દુ અને મુસ્લિમો વચ્ચે દુશ્મનાવટ છે. આ તંગદિલીભર્યા વાતાવરણ વચ્ચે કચ્છ(Kutch)માં એક ક્ષત્રિય પુત્રએ મુસ્લિમ યુવક માટે પોતાનો જીવ આપી દીધો હોવાની ઘટના સામે આવી છે. જેમાં 24 વર્ષીય જીતેન્દ્રસિંહ જાડેજા(Jitendrasinh Jadeja)એ ક્ષત્રિય ધર્મની વ્યાખ્યાને અનુસરીને કટોકટીના સમયે મદદ માંગતા લોકોને નિરાશ ન કરવા માટે પોતાના જીવનનું બલિદાન આપ્યું હતું.

મળતી માહિતી મુજબ, બે દિવસ અગાઉ ભચાઉ નજીક નર્મદા કેનાલમાં અકરમ અબડા નામનો મુસ્લિમ યુવાન ડૂબી રહ્યો હતો. તે જ દરમિયાન ત્યાંથી પસાર થઈ રહેલા જિતેન્દ્રસિંહ જાડેજાએ એક ક્ષણનો પણ વિલંબ કર્યા વગર કૂદકો મારી દીધો હતો. જોકે, આ ઘટનામાં બંનેનાં કરુણ મોત નીપજ્યા હતાં. આ અંગે મૃતક ક્ષત્રિય યુવાનના પિતરાઈ અને ગામના સરપંચ સાથે વાત કરતા આખી ઘટના જાણવા મળી હતી.

ભચાઉ SRP કેમ્પ નજીક આવેલી નર્મદા કેનાલમાં મુસ્લિમ યુવાન અક્રમ યુસુફભાઈ અબડા માતાની નજર સામે પાણીમાં ડૂબી રહ્યો હતો. જેને બચાવવા માટે ચોપડવા ગામના 24 વર્ષીય ક્ષત્રિય યુવાન જિતેન્દ્રસિંહ બળવંતસિંહ જાડેજા પણ કેનાલમાં કુદી પડ્યો હતો. જેમાં બંનેના જીવ ગયા હતા. આ ઘટના બાદ મુસ્લિમ યુવાન અકરમનો મૃતદેહ મળ્યો હતો. જ્યારે જિતેન્દ્રસિંહ જાડેજાનો મૃતદેહ જે જગ્યાએ બનાવ બન્યો હતો એનાથી 10 કિલોમીટર દૂર એનઆરઈ કોક કંપની પાછળ નર્મદા કેનાલમાંથી 20 કલાક બાદ મળી આવ્યો હતો.