અડધા ભાવે સોનુ અપાવુ કહીને લાખો રૂપિયા ચાઉં કરી ગયેલ ગઠીયાની પોલીસે કરી ધરપકડ- આ રીતે કરતો હતો ઠગાઈ

સુરત(Surat): શહેરમાં માર્કેટ ભાવ કરતા 10 હજાર રૂપિયા ઓછા ભાવે સોનાના બિસ્કિટ(Gold biscuits) ખરીદવાની લાલચમાં અડાજણ(Adajan)ના છ મિત્રોએ 22.35 લાખ રૂપિયા ગુમાવવાનો વારો આવ્યો હતો. ઠગબાજ મામા-ભાણેજે લાખ્ખો રૂપિયા પડાવી લઇ સોનાના બિસ્કિટ નહીં આપતા તેમની વિરુદ્ધ પોલીસે ઠગાઈનો ગુનો દાખલ કરી તપાસ હાથ ધરી છે.

સિંગણપોર ડભોલી લિંક રોડ સીવાન એવન્યુ ખાતે રહેતા મૂળ ભાવનગરના 22 વર્ષીય જેનિશ શેટા ઓફિસ રાખી ઓનલાઈન સેલિંગનો વેપાર કરે છે. જેનિશની બે વર્ષ પહેલા કતારગામમાં પાનના ગલ્લે માવા ખાવા માટે જતી વખતે વિરેશ તરસરીયા સાથે પરિચય થયો હતો. જે તે સમયે વિરેશે તેના મામા મનસુખ ધોળકિયા સાથે અડાજણમા પેન્ટાલુન ખાતે ઓફિસ રાખી ભાગીદારીમાં ક્રિપ્ટો કરન્સીનો ધંધો તથા સોનાના બિસ્કીટમાં પણ રોકાણ કરતા હોવાનું જણાવ્યું હતું. આ સાથે જેનિશને પોતાની સાથે સોનામાં રોકાણ કરવા પર બજાર ભાવથી સસ્તું સોનું આપવાની લાલચ આપી હતી.

જેનિશે તેના મિત્ર આકાશ સલીયાને વાત કર્યા બાદ બંને જણા ગત 26 જૂનના રોજ વિરેશને તેની ઓફિસે મળવા માટે ગયા હતા. ત્યારે વિદેશે બજારભાવ કરતા એક સોનાના બિસ્કીટ ઉપર રૂપિયા 10 હજાર સસ્તા ભાવે આપીશ તેમ કહ્યું હતું. જેનિશે લાલચમાં આવી આ અંગે તેના અન્ય મિત્રોમાં વાત કરી ધંધો કરવાનું નક્કી કર્યા બાદ જેનિશે રૂપિયા 7 લાખ, ધર્મેન્દ્રસિંહ મોરીએ રૂપિયા 5 લાખ, વિજય ભડીયાદરાએ 4.35 લાખ, આકાશે રૂપિયા 2 લાખ, દર્શનને રૂપિયા 4 લાખ મળી કુલ રૂપિયા 22.35 લાખ ભેગા કર્યા હતા. 28 જૂનના રોજ આ પૈસા લઈને ઓફિસે ગયા હતા. ત્યાં વિરેશ અને તેના મામા મનસુખ હાજર હતા.

વિરેશને પૈસા આપતા તેણે બેગમાં પૈસા મુકી મનસુખને ‘પેમેન્ટ તમારી પાસે રાખો અને બાજુની ઓફિસમાંથી 5 સોનાના બિસ્કીટ લઈ આવો’ તેમ કહી જેનિસ અને તેના મિત્રને પંદરેક મિનીટ બેસવા કહ્યું હતું. બાદમાં સાંજ સુધી મનુસખ બિસ્કીટ લઈને આવ્યો ન હતો અને વિરેશે પણ ‘મારે વકીલ પાસે કામ છે, હું તમને મોડીરાત્રે અથવા આવતીકાલે બિસ્કીટ આપી દઈશ’ તેમ કહી ઓફિસમાંથી નિકળી ગયો હતો.