કોરોના મહામારી વચ્ચે સુરતના હીરાઉદ્યોગ માટે આવ્યા સારા સમાચાર, શરુ થયું એક્પોર્ટ- જાણો અહી

કોરોના મહામારીને કારણે સમગ્ર ટ્રેડ અને ઇન્ડસ્ટ્રી થંભી ગઇ છે. વિશ્વની અર્થ વ્યવસ્થા ભાંગી પડી છે. કરોડો લોકો બેરોજગાર બન્યા છે. તે જ રીતે હીરાઉદ્યોગમાં પણ વેપાર ઠપ છે. આ તબક્કે આવી પરિસ્થિતિમાં સુધારારૂપી આશાનું કિરણ પ્રગટ્યું છે. હીરાઉદ્યોગકારો દ્વારા સુરતથી 10 ડાયમંડ કન્સાઇન્મેન્ટની વાયા મુંબઇ થઇ નિકાસ કરવામાં આવી છે.

જીજેઇપીસીના રિજિયન ચેરમેન દિનેશ નાવડિયાએ જણાવ્યું હતું કે, સુરતમાં તૈયાર થતા પોલિસ્ડ ડાયમંડની વાયા મુંબઇ નિકાસ થતી રહી છે. હાલમાં લોકડાઉનને કારણે મુંબઇ બીડીબીમાં તૈયાર હીરાનો જથ્થો છે. પરંતુ, મુંબઇમાં કસ્ટમ કિલયરન્સની સુવિધા હાલ ઉપલબ્ધ નથી. ખાસ રજૂઆત બાદ સુરત ખાતે સ્ટમ ક્લિયરન્સની સુવિધાને મંજૂરી મળી છે. આ તબક્કે ગતરોજ સુરતથી ૧૦ ડાયમંડ કન્સાઇન્મેન્ટ ફલાઇટ મારફત મુંબઇ મોકલાયા છે. જે ગુરુવારના રોજ હોંગકોંગ રવાના થયા છે.

આ પ્રકારે જો કોઇકે મુંબઇથી ડાયમંડ પાર્સલ લાવવા હોય અને તેને સુરત ખાતે ક્લિયરન્સ કરાવી વાયા મુંબઈ નિકાસ કરવા હોય તો, તે માટે જીજેઇપીસીનો સંપર્ક કરવાનો રહેશે. સુરત કલેકટર સાથેની વાતચીત બાદ કલેકટરે પણ નિકાસલક્ષી કામગીરીમાં જરૂરી મંજૂરી આપવા તૈયારી દર્શાવી છે. બીજી તરફ બીડીબીના પ્રમુખ અનુપ મહેતા સાથે વાત થઇ છે. જેઓ ગણતરીના સ્ટાફ સાથે નિર્ધારિત સમયમાં ડાયમંડ મેળવવાની સુવિધા ગોઠવવા સંમત થયા છે.