રીક્ષા સાથે ટકરાઈને બંને મિત્રો નીચે પડ્યા, ઉભા થાય એ પહેલા જ પાછળથી પૂરપાટ ઝડપે આવતા ટ્રકે કચડી નાખ્યા

મોરબી(ગુજરાત): આજકાલ વધી રહેલી અકસ્માતની ઘટના દરમિયાન ફરીવાર એક અકસ્માતની ઘટના સામે આવી છે જેમાં મોરબીના જેતપર રોડ પર આવેલ પાવડિયારી નજીક સવારે ડબલસવારીમાં બાઇકમાં જતા બે યુવાન રીક્ષા સાથે ટકરાયા હતા અને બન્ને રોડ પર નીચે પટકાયા હતા.

હજુ તો બન્ને કંઇ સમજે અને ઉભા થાય એ પહેલાં જ પાછળથી એક ટ્રેલર આવી ચઢ્યું હતું અને અચાનક બનેલી ઘટનાથી બેખબર ટ્રેલર ચાલક બ્રેક મારે તે પહેલા બાઈકમાંથી ઉથલી પડેલા યુવાન ઉપર ટ્રેલરના તોતિંગ વ્હીલ ફરી વળ્યા હતા. આથી ટ્રેલર નીચે કચડાતા આ યુવાનનું ઘટનાસ્થળે જ મોત નીપજ્યું હતું. આ ઉપરાંત, સાથેના યુવકને ગંભીર ઇજા પહોંચતા તેને સારવારમાં ખસેડવામાં આવ્યો હતો. ત્યારબાદ પોલીસ દ્વારા અકસ્માતની વધુ તપાસ હાથ ધરવામાં આવી છે.

મળતી માહિતી મુજબ, મોરબીના જેતપર રોડ ઉપર પાવડિયારી નજીક આવેલા સિરામિક કારખાનામાં રહીને મજૂરી કામ કરતો ચિરાગ મનસુખભાઇ ચાવડા નામનો યુવાન આજે પોતાના મિત્ર સાથે ડબલ સવારી બાઇકમાં મોરબી શહેરમાં કોઈ કામે આવ્યા બાદ પરત જઈ રહ્યો હતો. આ દરમિયાન, જેતપર રોડ ઉપર ડબલ સવાર બાઈક રોંગ સાઇડમાંથી ધસી આવીને સામેથી આવતી રીક્ષા સાથે ધડાકાભેર ટકરાયું હતું.