સૌરાષ્ટ્ર અને દક્ષિણ ગુજરાતના ખેડૂતો માટે આવી રહી છે મોટી આફત- જાણો અહીં

દેશના હવામાન વિભાગની આગાહી મુજબ આગામી 6-7 નવેમ્બરે ગુજરાતમાં ભારે પવન સાથે વરસાદની આગાહી છે. હાલમાં ‘મહા’ નામનું વાવાઝોડું અરબી સમુદ્રમાં સક્રિય છે અને તે દર 6 કલાકમાં 24 કિલોમીટરનું અંતર કાપી રહ્યું છે. ‘મહા’ વાવાઝોડું પણ ઓમાન તરફ ફંટાય તેવી શક્યતા હતી, પરંતુ હવે ગુજરાત તરફ આગળ વધી રહેલુ આ વાવાઝોડું સૌરાષ્ટ્ર અને દક્ષિણ ગુજરાતના કાંઠાના વિસ્તારોને અસર કરે તેવી આગાહી કરવામાં આવી છે.

વધુમાં હવામાન વિભાગના ડાયરેક્ટર જયંત સરકારે જણાવ્યું હતું કે ‘મહા’ વાવાઝોડાના કારણે દક્ષિણ ગુજરાત અને સૌરાષ્ટ્રના કાંઠા વિસ્તારોમાં 2 નવેમ્બરે ભારે વરસાદની વકી છે. આ વાવાઝોડાની અસરના કારણે ભાવનગર, અમરેલી, ગીરસોમનાથ અને નવસારી જિલ્લામાં અનેક સ્થળોએ ભારે વરસાદ વરસી શકે છે.

ઉલ્લેખનીય છે કે, ગુજરાત તરફ આવેલા ‘કયાર’ વાવાઝોડાના કારણે ખરીફ પાકોમાં ખૂબ મોટું નુકસાન થયું હતું. હવે ‘મહા’ નામના વાવાઝોડાનો ખતરો પણ ગુજરાત પર તોળાઇ રહ્યું છે, જેને કારણે જગતનો તાત ચિંતિત બન્યો છે.

‘મહા’ વાવાઝોડાની અસરને પગલે રાજ્યના દરિયાકાંઠા વિસ્તારમાં આવેલા જિલ્લાઓ ખાસ કરીને સૌરાષ્ટ્રના પોરબંદર, દેવભૂમિ દ્વારકા, સોમનાથ, જૂનાગઢમાં ભારે વરસાદની આગાહી છે. આજે સોમનાથ, જૂનાગઢ, પોરબંદર, દ્વારિકા ના દરિયાકાંઠા ના વિસ્તારોમાં વરસાદી જાપટાએ ખેડૂતોને નિરાશ કર્યા છે.