ડ્રીંક એન્ડ ડ્રાઈવ કેસમાં અતુલ વેકરીયા તરફથી મૃતકના પરિવારને લાલચના ફોન શરુ, જાણો શું કહ્યું પરિવારના સભ્યોએ…

હાલમાં એક સમાચાર સામે આવ્યા છે. સુરતમાં થયેલ ડ્રિંક એન્ડ ડ્રાઈવ કેસમાં ચોંકાવનાર ઘટસ્ફોટ સામે આવ્યા છે. અતુલ બેકરીના માલિક અતુલ વેકરિયાએ ઉર્વશી ચૌધરીને દારૂ પીધેલી હાલતમાં ગાડી હંકારતાં અડફેટે લેતાં મોત થયું હતું. પરિવારજનોએ આરોપ મુક્યો છે કે, અમારા પર ફોન કરીને કેસને દબાવી દેવા માટેની લાલચ આપવાનો પ્રયત્ન કરવામાં આવ્યો છે. રૂપિયા તથા રાજકીય વગ વાપરીને કેસને રફેદફે કરવા માટેનાં ષડયંત્ર રચવામાં આવ્યા છે.

પોલીસની કામગીરી પર શંકા :
અતુલ વેકરિયા ઉર્વશી ચૌધરી નામની યુવતીને અડફેટે લેતાં તેનું મોત થયું હતું. ઉર્વશી ચૌધરીની અંતિમવિધિ સુરત જિલ્લામાં આવેલ બારડોલીમાં કરાઈ હતી. મૃતકનાં પરિવારજનોએ દુઃખ વ્યક્ત કરતાં કહ્યું હતું કે, અતુલ વેકરિયાના રાજકીય સંબંધો નેતાઓની સાથેના ખૂબ જ પાસેના હોવાને લીધે પોતે પૈસાદાર હોવાથી પોલીસ પણ તેને મદદ કરી રહી છે, જેને લીધે પોલીસની કામગીરી પર પણ આશંકા ઊભી થઈ છે.

બહેનને ન્યાય અપાવીશ-ભાઈ
મૃતકના ભાઇ નીરજ ચૌધરીએ પોતાની નિર્દોષ બહેનને મોતને ઘાટ ઉતારનાર અતુલ વેકરિયાને કડકમાં કડક સજા આપવામાં આવે એવી માંગણી કરવામાં આવી હતી. આની સાથે જ કાયદાકીય રીતે મારી બહેનને ન્યાય મળે એવી અમે પરિવારજનો આશા રાખીને બેઠા છીએ. જે રીતે ખેલ પોલીસ સ્ટેશનમાં થઈ રહ્યા છે એને જોતાં અમને પોલીસની કામગીરી પર પણ આશંકા ઊભી થઈ છે. ભલે અતુલ વેકરિયા ગમે તેટલા પ્રયત્નો કરીને અમારા પર દબાણ લાવી કેસને દબાવવાનો પ્રયત્ન કરવામાં આવશે પણ હું મારી બહેનને ન્યાય અપાવીને જ રહીશ.

અગ્નિદાહ આપી વિદાય આપી-માતા
મૃતકની માતાએ કહ્યું હતું કે, મારે મારી દીકરીની લગ્ન કરીને વિદાય કરવાની હતી પરંતુ અમારે તેને અગ્નિદાહ આપવો પડયો છે. મારી દીકરીના મોત માટે મને 50 લાખ રૂપિયામાં આપવામાં આવે તો એ રૂપિયાનું અમે શું કરીશું? મારી વહાલસોયી દીકરીથી બીજું કોઈ મહત્ત્વનું નથી. એ મારી દીકરી નહીં પણ દીકરો હતો. અમે ન્યાયની આશા રાખીને બેઠા છીએ. અમારા પરિવારમાંથી જો કોઇને કંઇ પણ થશે તો એની માટે અતુલ વેકરિયા જવાબદાર ગણાશે.