શું ગુજરાતમાં ઘટશે પેટ્રોલ-ડીઝલના ભાવ? GST લાગુ કરવા તૈયાર છે ગુજરાત સરકાર પરંતુ…

હાલમાં મોંઘવારીમાં સતત વધારો થઈ રહ્યો છે. આની સાથે-સાથે જ પેટ્રોલ-ડીઝલના ભાવમાં પણ સતત વધારો થઈ રહ્યો હોવાથી વાહનચાલકો ખુબ પરેશાન થઈ ગયાં છે. એક અહેવાલ અનુસાર, ઓપેક અને બીજા દેશોએ ક્રૂડતેલના ઉત્પાદનમાં મેં સુધી ઘટાડો કરવાની ફરી જાહેરાત કરી છે. જેના કારણે પેટ્રોલ અને ડીઝલની કિંમતમાં હજુ પણ વધારો થઇ શકે છે. આ પગલાને કારણે દેશના અમુક ભાગોમાં પેટ્રોલની કિંમત 100 રૂપિયા સુધી પહોંચી શકે છે. સરકારની આશા હતી કે આગામી દિવસોમાં ક્રુડનું ઉત્પાદન વધતા પેટ્રોલ અને ડીઝલની કિંમતોમાં ઘટાડો આવશે પરંતુ તે આશા પર પાણી ફરી વળ્યું છે. હાલ દેશમાં પેટ્રોલની કિંમત છે તેમાંથી 60 ટકા ટેક્સ નાખવામાં આવ્યો છે.

વધતા-જતા પેટ્રોલ-ડીઝલના ભાવને લઈને ગુજરાતના નાયબ મુખ્યમંત્રી નીતિન પટેલે આજે એક મોટું નિવેદન આપ્યું છે. નીતિન પટેલે કહ્યું કે, ગુજરાત પેટ્રેલ-ડીઝલને GSTમાં લઈ જવા તૈયાર છે. પરંતુ વેટના ટેક્સની આવક ગુજરાતને મળવી જરૂરી છે. કારણ કે, પેટ્રોલ-ડિઝલને GSTમાં લાવવામાં આવશે તો આવકના 50 ટકા કેન્દ્ર લઈ જશે. માત્ર 50 ટકા રાજ્યને મળશે. જ્યારે હાલ પેટ્રોલ-ડિઝલ પરના ટેક્સની આવક પુરેપુરી ગુજરાત સરકાર પાસે જાય છે.

ગુજરાત વિધાનસભામાં આજે પેટ્રોલ ડીઝલના વધતા ભાવને લઈને ચર્ચા કરવામાં આવી હતી. જેમાં ઘણા લાંબા સમયથી ચર્ચા ચાલી રહી છે કે પેટ્રોલ-ડીઝલને GST હેઠળ લઈ જવામાં આવે ત્યારે આજે ગૃહમાં ડેપ્યૂટી સીએમ નીતિન પટેલે જણાવ્યું હતું કે, હું સ્પષ્ટ વાત કરવા માગું છું કે GSTનો બેઝિક કાયદો એવો છે કે આવકના 50 ટકા રાજ્યને તો 50 ટકા કેન્દ્રને જાય.

નીતિન પટેલે વધુમાં જણાવ્યું હતું કે, સિમેન્ટ ગુજરાતમાં બને પણ એનું મોટું વેચાણ અન્ય રાજ્યમાં જાય તો ટેક્સએ રાજ્યને મળે છે. ગુજરાતના જ્યારે મુખ્યમંત્રી તરીકે નરેન્દ્ર મોદી હતા, ત્યારે તેમની માંગણી હતી કે શરૂઆતના 5 વર્ષ ગેરેન્ટી આપે, કેન્દ્રમાં ચિદમ્બરમે તે વખતે હા પણ પાડી હતી. પરંતુ કોંગ્રેસની સરકાર રાજ્યોને રક્ષણ આપતી ન હતી. બધાને મીઠું બોલવું ગમે છે, પણ એની અસર શું થાય તે તો આવનારો સમય જ દેખાડે છે.