આભ ફાટ્યું હોય એમ ગુજરાતના આ તાલુકામાં બે કાંઠે વહી નદી- એકાએક પુર આવતા યુવક તણાયો- જુઓ LIVE વિડીયો

જામનગર(ગુજરાત): હાલના વરસાદી માહોલ વચ્ચે જામનગર જિલ્લામાં ગઈકાલે જાણે આભ ફાટ્યું હોય એમ મુશળધાર વરસાદ ખાબક્યો હતો. ભારે વરસાદને પગલે જિલ્લાની અનેક નદીઓ બે કાંઠે વહી રહી છે. આ ઉપરાંત, કાલાવડ તાલુકામાં ધોધમાર વરસાદ વરસ્યો હતો. તાલુકાના ખંઢેરા ગામ પાસેથી વહેતી નદીમાં એકાએક પાણીનો પ્રવાહ વધ્યો હતો. જેને કારણે એક યુવક તણાયો હતો જેનો વીડિયો સોશિયલ મીડિયામાં વાઈરલ થયો છે. યુવક તણાતો હોવાની જાણ થતાં ગ્રામજનો એકઠાં થયાં હતાં અને સહિયારા પ્રયાસથી યુવકને બચાવી લેવામાં આવ્યો હતો.

ભારે વરસાદને કારણે ખંઢેરાની નદીના જળસ્તરમાં વધારો નોંધાયો છે જેને કારણે કોઝવે પર નદીના પાણી ફરી વળ્યા છે. જાણવા મળ્યું છે કે, પાણી ફરી વળતાં જામનગર-કાલાવડ હાઇવેને ડાઇવર્ટ કરવામાં આવ્યો છે અને કાલાવડ તરફ આવતાં વાહનોને રણુજા તરફ ડાઈવર્ટ કરવામાં આવ્યાં છે. જામનગરના કાલાવડ પંથકમાં મેઘરાજા મન મૂકીને વરસ્યા છે. ધોધમાર વરસાદ પડવાને કારણે કાલાવડ તાલુકાનાં કેટલાંક ગામોમાં નદી-નાળાં છલકાઈ ગયાં હોવાનું પણ સામે આવ્યું છે. કાલાવડમાં કુંભનાથ પરામાં પણ ગાબડું પડતાં ગામ બેટમાં ફેરવાઈ ગયું હતું.

જાણવા મળ્યું છે કે, જોડિયા તાલુકાના બાલંભા ગામે છેલ્લા 24 કલાકમાં 7 ઈંચ વરસાદ ખાબકયો છે. આથી આજી નદી બે કાંઠે વહેતાં ખેડૂતોમાં ખુશીની લાગણી જોવા મળી હતી. જોકે કોઇ જાનહાનિ થઇ ન હતી. ભારે વરસાદને કારણે જોડિયા તાલુકાના પંચાયતના માજી પ્રમુખ જેઠાલાલ આઘેરા, સરપંચ ઈશ્વરભાઈ ખોલિયા દ્વારા ગામની મુલાકાત લેવામાં આવી હતી.