જુઓ કેવી રીતે ત્રણ વર્ષના બાળકે બચાવ્યો ગર્ભવતી માતા અને દૂધ પિતા ભાઈનો જીવ

મુરાદાબાદ: આજકાલ તમે માતાની મમતાના અનેક કિસ્સા સાંભળ્યા હશે. પરંતુ, આજે અમે તમને ઉત્તર પ્રદેશના મુરાદાબાદ રેલવે સ્ટેશન પર બનેલો એક કિસ્સો જણાવવા જઈ રહ્યા છીએ જે તેમને ભાવુક કરી દે તેવો છે. સોશિયલ મીડિયા પર વાયરલ થઈ રહેલા એક વીડિયોમાં ત્રણ વર્ષના માસૂમ બાળકને હીરો બતાવવામાં આવી રહ્યો છે. આ ત્રણ વર્ષના બાળકે અજાણ્યા શહેરમાં અજાણ્યા લોકો વચ્ચે પોતાની ફરજ ખૂબ સારી રીતે નિભાવી હતી.

જાણવા મળ્યું છે કે, મુરાદાબાદ રેલવે સ્ટેશનના પ્લેટફોર્મ નંબર-1 પર બનેલા ફૂટ ઓવરબ્રિજ પર એક મહિલા ગરમીને કારણે બેભાન બની ગઈ હતી તેમજ મહિલા પાસે રહેલું તેનું નાનું બાળક ભૂખથી તડપી રહ્યું હતું. મહિલાની બાજુમાં બેઠેલા ત્રણ વર્ષના માસૂમે આ બધું જોઈ રહ્યો હતો. ત્યારબાદ તેને પોતાની માતા સાથે કંઈક અઘટિત બની રહ્યાનો અંદાજ આવી ગયો હતો. ત્યારે માસૂમ આમતેમ જોવા લાગ્યો હતો.

આ દરમિયાન કોઈ મદદ કરે તેવું ન દેખાતા માસૂમ પ્લેટફોર્મ નંબર-1 પર બનેલી જીઆરપી ચોકી તરફ ચાલવા લાગ્યો હતો. ચોકી ખાતે પહોંચીને માસૂમે જવાનોને કંઈક કહેવાનો પ્રયાસ કર્યો. પરંતુ, તે બોલી શક્યો ન હતો. ત્યારબાદ માસૂમ ઇશારોથી પોતાની વાત કહેવા લાગ્યો હતો. મહિલા પોલીસકર્મીને લાગ્યું કે, તેને ભૂખ લાગી છે અથવા તે પોતાના પરિવારથી અલગ થઈ ગયો છે. જોકે, બાળકે ઈશારો કરીને મહિલા પોલીસકર્મીઓને પોતાની સાથે જવાનું કહ્યું.

ત્યારબાદ પોલીસકર્મીઓ ફૂટઓવર બ્રિજ પર પહોંચ્યા તો જોયું કે, માસૂમની માતા બેભાન હાલતમાં પડી છે અને નાનું બાળક મહિલાની છાતીને વળગીને પડ્યું છે. પહેલા પોલીસકર્મીઓ દ્વારા મહિલાના મોઢા પર પાણી છાંટીને તેને ભાનમાં લાવવાનો પ્રયાસ કરવામાં આવ્યો હતો. મહિલા ભાનમાં ન આવતા કંટ્રોલરૂમમાં ફોન કરીને એમ્બ્યુલન્સ મંગાવવામાં આવી હતી અને મહિલાને જિલ્લા હૉસ્પિટલમાં ખસેડવામાં આવી હતી. ડૉક્ટરોના કહેવા મુજબ, મહિલા ત્રણ મહિનાની ગર્ભવતી છે. જેથી ગરમીને કારણે બેભાન થઈ ગઈ હતી.