દિલ્હીમાં વધુ એક ‘શ્રદ્ધા હત્યા કાંડ’! યુવતીના મૃતદેહના 7 થી 8 ટુકડા મળી આવતા મચ્યો હાહાકાર, જાણો ખૌફનાક કહાની

7 to 8 pieces of the girl were found in Delhi: બુધવારે સવારે દિલ્હીના ગીતા કોલોની વિસ્તારમાં ફ્લાયઓવર પાસે ઝાડીઓમાંથી એક મૃતદેહ મળી આવ્યો હતો. મૃતદેહ અનેક ટુકડાઓમાં કપાયેલો મળી આવ્યો છે. ઘટનાની જાણકારી મળતા જ દિલ્હી પોલીસની ટીમ ઘટનાસ્થળે પહોંચી અને તપાસ શરૂ કરી હતી. આ મામલો આજે સવારે લગભગ 9 વાગ્યાનો છે. પોલીસને માહિતી મળી કે ફ્લાયઓવર પાસે એક લાશ પડી છે. માહિતી મળતાં જ ટીમ ઘટનાસ્થળે પહોંચી અને જોયું કે મૃતદેહના ઘણા ટુકડા થઈ ગયા હતા. તે જ સમયે પોલીસ નજીકમાં લાગેલા સીસીટીવી કેમેરાના ફૂટેજ દ્વારા મૃતક અને આરોપીની ઓળખ કરવાનો પ્રયાસ કરી રહી છે.

પોલીસ ટીમ ઓર્થો ફોરેન્સિક ટીમની મદદ લઈ રહી છે. જેથી મૃતદેહના ટુકડા મહિલાના છે કે પુરૂષના છે તે જાણી શકાય, પરંતુ પ્રથમ દૃષ્ટિએ મૃતદેહના ટુકડા માત્ર મહિલાના જ હોવાનું જણાય છે. જ્યારે 3 જિલ્લાની પોલીસ અને અધિકારીઓ સ્થળ પર હાજર છે, એક જ જગ્યાએથી 2 અલગ-અલગ પોલિથીનમાંથી 7 થી 8 મૃતદેહના ટુકડા મળી આવ્યા છે.

સેન્ટ્રલ રેન્જના જોઈન્ટ સીપી પરમાદિત્યના જણાવ્યા અનુસાર ફ્લાયઓવર પાસેની ઝાડીઓમાંથી બે પોલીથીન બેગ મળી આવી હતી. મૃતદેહનું માથું પોલીથીન બેગમાં અને શરીરના અન્ય ભાગો અન્ય પોલીથીનમાં રાખવામાં આવ્યા હતા. પોલીસના જણાવ્યા અનુસાર મૃતદેહના માથા પરના વાળ લાંબા છે, જેના આધારે એવું માનવામાં આવે છે કે તે મહિલાના છે. હજુ તેની ઓળખ થઈ શકી નથી. પોલીસ આ કેસની તપાસ કરી રહી છે.

શ્રદ્ધા હત્યા કેસની યાદો તાજી
આ કિસ્સાએ ફરી એકવાર શ્રદ્ધા મર્ડર કેસની યાદ અપાવી છે. ગયા વર્ષે શ્રદ્ધાના લિવ-ઇન પાર્ટનર આફતાબે તેનું ગળું દબાવીને હત્યા કરી હતી. હત્યા બાદ તેની લાશના 35થી વધુ ટુકડા કરવામાં આવ્યા હતા. મૃતદેહના ટૂકડા કોઈને મળી ન શક્યા તે માટે આરોપીએ લાશના ટુકડાને અલગ-અલગ જગ્યાએ ફેંકી દીધા હતા.