15 વર્ષની બાળકીના પેટમાંથી નીકળ્યા 4 કિલો વાળ, જાણો સમગ્ર ઘટના

ઉત્તર પ્રદેશના ફર્રુખાબાદમાં રહેતી 15 વર્ષની કિશોરીને થોડા દિવસોથી પેટમાં દુખાવો થયો હતો. પિતા સુનીલ કુમારે શિવાનીને લોહિયા હોસ્પિટલમાં ડૉક્ટર પાસે ઈલાજ માટે લઈ ગયા. કાયમગંજ તાલુકાના મઈ રસીદપુર ગામમાં રહેતા સુનીલ કુમારની દીકરી શિવાનીની લોહિયા હોસ્પિટલમાં ડૉક્ટર ઈમરાન અલીએ શારીરિક તપાસ કરી તો તેના પેટમાં વાળનું ફીંડલું હોવાની પુષ્ટિ થઈ. સોમવારે સર્જન ડૉક્ટર ઈમરાન અલીએ શિવાનીનું ઓપરેશન કર્યું. ઑપરેશન દરમિયાન તેના પેટમાંથી ચાર કિલો વાળ નિકળ્યા. તેમણે કહ્યું કે સમયસર ઓપરેશન થવાના કારણે કિશોરીનો જીવ બચી ગયો. ડૉક્ટર્સે કહ્યું કે, જો સમયસર બાળકીને હોસ્પિટલે લઈ જવામાં ના આવી હોત તો તેનો ઈલાજ ના થઈ શકત અને તેનો જીવ પણ જઈ શકે તેમ હતો.

પરિજનોએ જણાવ્યું કે શિવાનીને બાળપણથી જ વાળ ખાવાની લત લાગી ગઈ હતી. પાંચ વર્ષની ઉંમરથી જ તે વાળ ખાઈ રહી હતી. ડૉ ઈમરાન અલીએ જણાવ્યું કે વાળ ખાવાના કારણે શિવાનીના પેટમાં વાળ જમા થઈ ગયા હતા. આ કારણે તેના પેટમાં સતત દુખાવો થતો હતો. ઓપરેશન કરી તેના પેટમાંથી ચાર કિલો વાળનું ફીંડલું કાઢવામાં આવ્યું છે. તેમણે કહ્યું કે શિવાનીની હાલાત હવે ઠીક છે.