June 26, 2024
શુક્રવારે સુરત પાલિકાની યોજાયેલી શિક્ષણ સમિતિની ચૂંટણીમાં આપના એક ઉમેદવાર ક્રોસ વોટિંગથી હારી જતા 27 કોર્પોરેટરો દ્વારા ભારે ધમાલ મચાવવામાં આવી હતી. આ કેસમાં શનિવારે પાલિકાના સિક્યુરિટી ઓફિસર દ્વારા 27 કોર્પોરેટરો ઉપરાંત અન્ય 2 મળી કુલ 29 સામે રાયોટિંગ, સરકારી ફરજમાં રુકાવટ, મારામારી સહિતની 14 કલમો હેઠળ ગુનો નોંધાવવામાં આવ્યો હતો. આ પ્રકરણમાં પોલીસ દ્વારા આપના વિરોધ પક્ષના નેતા ધર્મેશ ભંડેરી સહિતના કોર્પોરેટરોની ધરપકડ કરી આગળની તપાસ હાથ ધરવામાં આવી છે.
જેથી આપના કાર્પોરેટરો દ્વારા ભાજપ સરકાર ચોરના નારા લગાવવામાં આવ્યા હતા. પાંચ જેટલા કોર્પોરેટરને સામાન્ય સભા ખંડની બહારથી ઝડપી પાડવામાં આવ્યા હતા. અહી ઉલ્લેખનિય છે કે, આજે પાલિકાની ઓફલાઈન સામાન્ય સભા છે. સામાન્ય સભા વિપક્ષ વગર જ યોજાય તેવી સ્થિતિ નિર્માણ થઈ છે. આમ આદમી પાર્ટીના કોર્પોરેટર પર ગુણો દાખલ કર્યા બાદ આજે પોલીસ દ્વારા તમામની ધરપકડ કરવામાં આવી હતી.
સામાન્ય સભામાં પ્રવેશતા જ ગેટ પર જ કોર્પોરેટરને પકડી લઈને પોલીસ દ્વારા ધરપકડ કરવામાં આવી હતી. આપના કોર્પોરેટરને ઝડપવા પોલીસને ભારે મથામણ કરવી પડી હતી. આ દરમિયાન પાંચ કોર્પોરેટર તો પાલિકામાં જ સંતાઈ ગયા હતાં. આ કોર્પોરેટર પાલિકાની સામાન્ય સભામાં ભાગ લેવા માટે સરદાર ખંડમાં જવા માટે આવ્યાં કે તરત જ ગેટ પરથી તમામની ધરપકડ કરી લેવામાં આવી હતી.
આ દરમિયાન યોગેશ જાદવાણીએ જણાવ્યું હતું કે, શિક્ષણ સમિતિની ચૂંટણીમાં થયેલા ગોટાળા મુદ્દે જવાબ આપવો પડે એ માટે ભાજપના ટોચના નેતાઓ દ્વારા પોલીસ પર દબાણ લાવી આપના કોર્પોરેટરોની ધરપકડનું આયોજન કરવામાં આવ્યું છે. કોર્પોરેશન બહાર હાલ પોલીસનો ચુસ્ત બંદોબસ્ત ગોઠવી દેવામાં આવ્યો છે. એની પાછળનું એક જ કારણ હોય શકે કે, આજે મળનારી સામાન્ય સભામાં આપના કોર્પોરેટર હાજરી આપવા આવે તે પહેલાં જ એમની અટકાયત કરી દેવાય.
આજે 450 દિવસ બાદ પહેલીવાર પાલિકાની ઓફલાઈન સામાન્ય સભા પાલિકા ખાતે યોજાઈ છે. જેમાં વિપક્ષ હોબાળો મચાવે તેવી શક્યતા પહેલાંથી જ જોવામાં રહી હતી. જેથી ચુસ્ત પોલીસ બંદોબસ્ત ગોઠવાઈ ગયો હતો. આ દરમિયાન આપના કોર્પોરેટરોની ધરપકડ કરવામાં આવી હતી. ત્યારબાદ પાલિકામાં તમામ કોર્પોરેટરના આઈડી ચેક કરી પ્રવેશ આપવામાં આવ્યો હતો. આ દરમિયાન ભાજપના તમામ કોર્પોરેટર અને મેયર અને સ્થાયી અધ્યક્ષ તમામ એક હોલમાં એકઠાં થયા હતા.
Trending News
જાણકાર સૂત્રોએ કહ્યું હતું કે, પોલીસ ફરિયાદમાં સ્પષ્ટ ઉલ્લેખ કરવામાં આવ્યો છે કે આપણા કોર્પોરેટરોનું આ આયોજનબદ્ધ કાવતરું હતું. ઉમેદવાર હારી જતાં યેનકેન પ્રકારે ચૂંટણી રદ કરાવવા હુલ્લડ કર્યું હતું. કુલ 120 બેલેટ પેપરમાંથી 118 બેલેટ પેપરના આધારે ચૂંટણીમાં હાર-જીતનો નિર્ણય જાહેર કરવામાં આવ્યો હતો. જ્યારે બે બેલેટ પેપર વિસંગતતાને લીધે બાકી રાખવામાં આવ્યા હતા.
જેમાં આપના ઉમેદવારની હારની ખબર પડતાં આપના કોર્પોરેટરોએ ભેગા મળી મત ગણતરી પત્રક ફાડી નાખવામાં આવ્યું હતું. સિક્યુરિટી સ્ટાફ સામે અને મત ગણતરીમાં રોકાયેલા સિક્યુરિટી ઓફિસરના સ્ટાફ સાથે મારામારી કરી કહ્યું હતું કે, ‘તમે ગુલામ છો, તમે ચોર છો, આ લોકોની ગુલામીથી કંઇ મળશે નહીં. તમને બધાને સસ્પેન્ડ કરાવી દઇશું.’ ચૂંટણીની કામગીરીને પણ અવરોધવા માટે દસ્તાવેજો ફાડી નાખ્યા હતા અને બેલેટ પેપર ઝૂંટવી ચૂંટણી પ્રક્રિયામાં વિક્ષેપ ઉભો કરવામાં આવ્યો હતો.
વધુમાં જણાવ્યું હતું કે, મેયરની આબરૂને નુકસાન પહોંચે તે પ્રકારના અભદ્ર વાક્યો ઉચ્ચારવામાં આવ્યા હતા. હુલ્લડ દરમિયાન સભાખંડના કાચ, ખુરશીઓ અને ટેબલની પણ તોડફોડ કરવામાં આવી હતી. પાલિકાના ઇતિહાસમાં બનેલી આ પહેલી ઘટનામાં પોલીસ દ્વારા બે કોર્પોરેટરની અટકાયત કરી આગળની તપાસ હાથ ધરવામાં આવી છે.
આજે પ્રથમ વખત સરદાર સભા ખંડમાં સામાન્ય સભા યોજશે ત્યારે આપ દ્વારા બે બેલેટ પેપરમાં ભુલનો આક્ષેપ અને ફેર ચૂંટણીની માંગને વળગી રહી આ ગરમાયેલા મામલે ફરી સામાન્ય સભામાં હોબાળો મચાવી શકે તેમ છે. સામાન્ય સભામાં ઉપરાંત આપના કોર્પોરેટરો નવા વિસ્તારોના સમાવેશ છતાં પ્રાથમિક સુવિધાનો અભાવ, ખાડી સફાઈ, સોસાયટીઓમાં સાફસફાઈ સહિતના મુદ્દા ઉઠાવે તેમ છે.
શહેરની ખાનગી સોસાયટીઓમાં પ્રત્યેક સુવિધાથી પરિપૂર્ણ કરી શહેરને પર્યાવરણલક્ષી બનાવવી સ્માર્ટ સિટીમાં રૂપાંતરિત કરવાના અને સીસી રોડના ઠરાવ અંગે પણ આપ કોર્પોરેટરો રસ્તા, સ્ટ્રીટલાઈટ જેવી પ્રાથમિક સુવિધાઓમાં છીંડા હોય તેથી ભારે વિરોધ કરે તેમ છે.
આપના કયા કોર્પોરેટર સામે ગુનો
ભાવના સોલંકી, મોનાલી હિરપરા, અલ્પેશ પટેલ, રાજુ મોરડીયા, ઋતુ દુગધરા, સોનલ સુહાગીયા, કનુ ગેડિયા, મહેશ અણઘણ, કુંદન કોઠીયા, સેજલ માલવિયા, ઘનશ્યામ મકવાણ, ધર્મેન્દ્ર વાવલીયા, નિરાલી પટેલ, મનીષા કુકડીયા, કિરણ ખોખાણી, અશોક ધામી, દિપ્તી સાંકળીયા, ડો. કિશોર રૂપારેલિયા, જ્યોતિ લાઠીયા, પાયલ સાકરિયા, શોભના કેવડિયા, જીતુ કાછડિયા, વિપુલ મોવલિયા, રચના હિરપરા, સ્વાતિ ઢોલરિયા, વિપુલ સુહાગિયા, ધર્મેશ ભંડારી
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. લેટેસ્ટ ન્યૂઝ અપડેટ્સ તમારા ફોન પર સૌથી પહેલા મેળવવા માટે આજે જ ડાઉનલોડ કરો ત્રિશુલ ન્યુઝની એન્ડ્રોઇડ એપ મોબાઇલ એપ્લિકેશન. અથવા Google Play Store માં જઈને Trishul News સર્ચ પણ કરી શકો છો. https://play.google.com/store/apps/details?id=com.trishul.news
અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.