પોલીસ કાયદામાં ટુંક સમયમાં થવા જઈ રહ્યા છે ધરખમ ફેરફાર- અમિત શાહે કરી જાહેરાત

કેન્દ્રીય ગૃહ પ્રધાન અમિત શાહે(Amit Shah) જણાવ્યું હતું કે સરકાર છ વર્ષથી વધુ સજાપાત્ર અપરાધો માટે ફોરેન્સિક તપાસ(Forensic investigation)ને “ફરજિયાત અને કાયદેસર” બનાવવાનું લક્ષ્ય રાખે છે. કેન્દ્ર સરકારે વિકસિત દેશો કરતાં દોષિત ઠેરવવાનો દર ઊંચો બનાવવા અને ફોરેન્સિક સાયન્સ(Forensic Science) તપાસ સાથે ફોજદારી ન્યાય પ્રણાલીને જોડવાનું લક્ષ્ય નક્કી કર્યું છે.

નેશનલ ફોરેન્સિક સાયન્સ યુનિવર્સિટી (NFSU), ગાંધીનગરના પ્રથમ દીક્ષાંત સમારોહમાં વિદ્યાર્થીઓને સંબોધતા શાહે જણાવ્યું હતું કે, સરકાર દેશના તમામ જિલ્લાઓમાં ફોરેન્સિક તપાસની સુવિધા પૂરી પાડશે અને તપાસ હાથ ધરવામાં આવે તે સુનિશ્ચિત કરવા માટે કાયદાકીય માળખું બનાવવામાં આવશે જેથી સ્વતંત્રતા અને નિષ્પક્ષતા જળવાઈ રહે.

અમિત શાહે કહ્યું કે, “વડાપ્રધાન નરેન્દ્ર મોદીના નેતૃત્વમાં કેન્દ્ર સરકાર ભારતીય દંડ સંહિતા (IPC), કોડ ઓફ ક્રિમિનલ પ્રોસિજર (CrPC) અને એવિડન્સ એક્ટમાં ફેરફાર કરવા જઈ રહી છે, કારણ કે આઝાદી પછી કોઈએ તેનું અર્થઘટન કર્યું નથી. ભારતીય પરિપ્રેક્ષ્યમાં આ કાયદાઓ જોયા નથી.”

મુખ્ય અતિથિ તરીકે સમારોહને સંબોધતા શાહે કહ્યું, “સ્વતંત્ર ભારતમાં આ કાયદાઓને ફરીથી અમલમાં મૂકવાની જરૂર છે. તેથી, અમે IPC, CrPC અને એવિડન્સ એક્ટમાં ફેરફારો માટે ઘણા લોકોની સલાહ લઈ રહ્યા છીએ.
કેન્દ્રીય મંત્રીએ કહ્યું, ‘આ હેઠળ, અમે ફોરેન્સિક તપાસની જોગવાઈને ફરજિયાત બનાવવા જઈ રહ્યા છીએ અને છ વર્ષથી વધુની જેલની સજાને પાત્ર અપરાધો માટે કાયદેસર બનાવવા જઈ રહ્યા છીએ.