સંસદમાં બિલ રજૂ થાય તે પહેલા ખેડૂતોએ દેખાડ્યું ‘દરિયા દિલ’- લીધો આ મોટો નિર્ણય

સોમવારથી સંસદનું સત્ર શરૂ થવાનું છે અને ખેડૂતોએ મોટો નિર્ણય(Big decision of the farmers) લીધો છે. વાસ્તવમાં ખેડૂતોએ 29 નવેમ્બરે યોજાનારી સંસદ કૂચને સ્થગિત(Parliament marches postponed) કરવાનો નિર્ણય લીધો છે. સંયુક્ત કિસાન મોરચા(SKM) દ્વારા આયોજિત પ્રેસ કોન્ફરન્સમાં આ જાહેરાત કરવામાં આવી છે. આ સાથે કિસાન મોરચા તરફથી એવું પણ કહેવામાં આવ્યું છે કે આગામી જાહેરાત 4 ડિસેમ્બરે કરવામાં આવશે.

ખેડૂત આગેવાનોએ માંગ કરી હતી:
ખેડૂત આગેવાનોએ તેમની પ્રેસ કોન્ફરન્સમાં જણાવ્યું હતું કે તેઓ સરકારની અત્યાર સુધીની જાહેરાતો સાથે સહમત નથી અને તેમની લડત લાંબા સમય સુધી ચાલશે. તેમણે માંગ કરી હતી કે સરકારે ખેડૂતો સાથે વાતચીત શરૂ કરવી જોઈએ અને સંસદમાં MSPની ખાતરી આપવી જોઈએ. ખેડૂત આગેવાનોએ કહ્યું કે સરકારે 4 ડિસેમ્બર સુધીમાં તેમના પત્રનો જવાબ આપવો જોઈએ અને જો તેમ નહીં થાય તો તેઓ આગળના નિર્ણયો લેશે. આ સાથે ખેડૂત નેતાઓએ કેન્દ્રીય ગૃહ રાજ્ય મંત્રી અજય મિશ્રા ઉર્ફે ટેનીને કેબિનેટમાંથી બરતરફ કરવાની માંગ કરી છે.

ખેડૂતો એક વર્ષથી ધરણા પર બેઠા છે:
નવા કૃષિ કાયદા સામે ખેડૂતોનો વિરોધ એક વર્ષથી વધુ સમયથી ચાલી રહ્યો છે અને ખેડૂતો દિલ્હીની સરહદો પર રોકાઈ રહ્યા છે. અગાઉ સરકારે કાયદામાં ફેરફારની જાહેરાત કરી હતી. આ અંગે સરકાર અને ખેડૂતો વચ્ચે અનેકવાર વાટાઘાટો થઈ હતી, પરંતુ કોઈ ઉકેલ આવ્યો ન હતો.

પીએમ મોદીએ કાયદો પાછો ખેંચવાની જાહેરાત કરી હતી:
જણાવી દઈએ કે વડાપ્રધાન નરેન્દ્ર મોદીએ 19 નવેમ્બરના રોજ રાષ્ટ્રને સંબોધિત કરતા નવા કૃષિ કાયદાઓને પરત ખેંચવાની જાહેરાત કરી હતી. આ સાથે પીએમ મોદીએ કૃષિ કાયદાનો વિરોધ કરી રહેલા ખેડૂતોને તેમના ઘરે પાછા જવાની અપીલ કરી હતી અને MSPને અસરકારક અને પારદર્શક બનાવવા માટે એક સમિતિની રચના કરવાની જાહેરાત કરી હતી. તેમણે કહ્યું, ‘એમએસપીને વધુ અસરકારક અને પારદર્શક બનાવવા માટે, ભવિષ્યને ધ્યાનમાં રાખીને આવા તમામ વિષયો પર નિર્ણય લેવા માટે એક સમિતિની રચના કરવામાં આવશે. આ સમિતિમાં કેન્દ્ર સરકાર, રાજ્ય સરકારો, ખેડૂતો, કૃષિ વૈજ્ઞાનિકો, કૃષિ અર્થશાસ્ત્રીઓના પ્રતિનિધિઓ હશે.