ISISના બે મોસ્ટ વોન્ટેડ આતંકવાદીઓને NIAએ મુંબઈથી દબોચી લીધા Trishul News Gujarati

NIA Arrest Two ISIS Terrorist: ભારતે મુંબઈ એરપોર્ટ પરથી બે મોસ્ટ વોન્ટેડ ભાગેડુ આતંકવાદીઓ અબ્દુલ્લા ફૈઝ શેખ અને તલ્હા ખાનની ધરપકડ કરી છે. આ શંકાસ્પદ આતંકવાદીઓ જકાર્તામાં છુપાયેલા હતા. આતંકવાદ સામે ભારતને વધુ એક મોટી સફળતા મળી છે. ભારતના (NIA Arrest Two ISIS Terrorist) બે મોસ્ટ વોન્ટેડ આતંકવાદીઓની ધરપકડ કરવામાં આવી છે. NIA એટલે કે કેન્દ્રીય તપાસ એજન્સીએ મુંબઈ એરપોર્ટ પરથી બે ભાગેડુ આતંકવાદીઓની ધરપકડ કરી છે. બંને આતંકવાદીઓની ઓળખ અબ્દુલ્લા ફૈઝ શેખ ઉર્ફે ડાયપરવાલા અને તલ્હા ખાન તરીકે થઈ છે. આ બંને આતંકવાદીઓ ઇન્ડોનેશિયાના જકાર્તામાં છુપાયેલા હતા. ભારત પરત ફરતી વખતે, બંનેને મુંબઈ એરપોર્ટ પર ઇમિગ્રેશન વિભાગ દ્વારા અટકાવવામાં આવ્યા હતા. આ પછી NIA એ તેમની ધરપકડ કરી.

બંને ભારતમાં આતંકી સંગઠન ISISના સ્લીપર સેલ છે
સૂત્રો કહે છે કે બંને આતંકવાદીઓ, અબ્દુલાલ ફૈઝ શેખ અને તલ્હા ખાન, 2023 ના પુણે IED કેસમાં આરોપી છે. આમાં તેની સામે IED (બોમ્બ) બનાવવા અને પરીક્ષણ જેવા આરોપોનો સમાવેશ થાય છે. આ બંને ભારતમાં આતંકી સંગઠન ISISના સ્લીપર સેલ છે. NIA ની ખાસ કોર્ટે બંને સામે બિનજામીનપાત્ર વોરંટ જારી કર્યું હતું. એટલું જ નહીં, આ બંને વિશે માહિતી આપવા બદલ પ્રત્યેકને 3 લાખ રૂપિયાનું ઇનામ પણ જાહેર કરવામાં આવ્યું હતું.

ISIS સાથે જોડાણ
NIA સૂત્રોએ જણાવ્યું હતું કે આ બંને આરોપીઓ ISISના પુણે સ્લીપર મોડ્યુલ સાથે સંકળાયેલા હતા. અન્ય 8 સભ્યોની ધરપકડ કરવામાં આવી છે. તેમનો ઉદ્દેશ્ય ભારતમાં અશાંતિ અને સાંપ્રદાયિક તણાવ ફેલાવીને સરકાર સામે યુદ્ધ કરવાનો હતો. ભારતમાં ઇસ્લામિક શાસન સ્થાપિત કરવાના ISISના કાવતરાનો આ એક ભાગ હતો.

અબ્દુલ્લા ફૈઝ શેખે પુણેના કોંધવા વિસ્તારમાં ભાડે મકાન લીધું હતું. આ ઘરમાં IED બનાવવામાં આવ્યા હતા. વર્ષ 2022-23 દરમિયાન તેણે બોમ્બ બનાવવાની તાલીમ વર્કશોપનું આયોજન કર્યું હતું. બંનેએ નિયંત્રિત વિસ્ફોટ કરીને IEDનું પરીક્ષણ પણ કર્યું હતું. આ કેસમાં UAPA, વિસ્ફોટક પદાર્થ અધિનિયમ, આર્મ્સ એક્ટ અને IPCની કલમો હેઠળ ચાર્જશીટ દાખલ કરવામાં આવી છે. આ કેસની તપાસ હજુ ચાલી રહી છે જેથી ભારતમાં ISISની આતંકવાદી ગતિવિધિઓનો સંપૂર્ણ પર્દાફાશ થઈ શકે.