કાવતરું : યુવતીની સગાઈ રોકવા માટે ફેક આઈડી બનાવીને ભાવિ પતિને મેસેજ કર્યા..

વન સાઈડ પ્રેમમાં પાગલ યુવકે યુવતીની સગાઈ અટકાવવા માટે  ઈન્સ્ટાગ્રામ પર ફેક આઈડી બનાવીને યુવતીના ભાવિ મંગેતરને મેસેજ કર્યા હતા. આ અંગે ફરિયાદ નોંધાતા પોલીસે યુવકની ધરપકડ કરી હતી.યુવતીને બદનામ કરીને સગાઈ અટકાવવા તેણે આ કૃત્ય કર્યું હોવાનું પોલીસને જણાવ્યું હતું.

કેસમાં સાઈબર ક્રાઈમે સૈજપુર બોધામાં રહેતા અને એન્જીનીયરીંગનો અભ્યાસ કરતા અર્પિતકુમાર જે.રાવલ(૨૦)ની ધરપકડ કરીને તેનો મોબાઈલ કબજે કર્યો હતો. અર્પિતના મામા વિરમગામમાં હીરપુરામાં રહેતા હોવાથી તે અવારનવાર તેમના ઘરે જતો હતો. દરમિયાન હીરપુરા ખાતે આવતી એક યુવતી સાથે તેની ઓળખાણ થઈ હતી. અવારનવાર મળવાનું થતા તેમની વચ્ચે મિત્રતા થઈ હતી. જોકે અર્પિત તેને પ્રેમ કરવા લાગ્યો હતો.