પોલીસના સમર્થનમાં ‘આપ’ આવ્યું મેદાનમાં, ગ્રેડ પેની માંગ સાથે શરૂ થયેલા પોલીસ આંદોલનમાં AAPની એન્ટ્રી

સુરત(Surat): પોલીસ કોન્સ્ટેબલ દ્વારા પે ગ્રેડની માંગણી સાથે શરૂ થયેલા આંદોલન(Police movement)માં હવે આમ આદમી પાર્ટી(Aam Aadmi Party)એ એન્ટ્રી મારી દીધી છે. આમ આદમી પાર્ટી દ્વારા ગુજરાત પોલીસના હક્ક અને અધિકાર માટે પોલીસના સમર્થનમાં આવીને પોલીસ કમિશનરને આવેદનપત્ર આપી ઉગ્ર રજૂઆતો કરવામાં આવી છે.

આ આવેદન પત્રમાં કેટલાક મહત્વના મુદ્દાઓની નોંધ કરવામાં આવી છે. જે મુદ્દામાં પોલીસનો પગાર વધારવા, પોલીસની બદલીમાં રાજકીય દખલગીરી બંધ કરવા, પોલીસને બિનજરૂરી ટાર્ગેટ આપવાનું બંધ કરવા, એસ.આર.પીને જિલ્લા વાઈઝ સ્થાયી કરવા, મહિલા પોલીસને મકાન ફાળવણીમાં પ્રાથમિકતા આપવા તેમજ કચેરીમાં પ્રાઈવસી આપવા, પોલીસનું યુનિયન બનાવવા સહિતના મુદ્દે ઉગ્ર રજૂઆત પોલીસ કમિશનર અને ગુજરાત સરકારને કરવામાં આવી છે.

પોલીસના સમર્થનમાં આપ આવ્યું મેદાનમાં: રાજ્યની સુરક્ષા અને સલામતીમાં પોલીસનો ખુબ મોટો ફાળો રહ્યો છે. ગુજરાત પોલીસના કારણે આપણે તહેવારો અને પ્રસંગોની ઉજવણી જોશ અને ઉત્સાહપૂર્વક કરી શકીએ છીએ. આજે ગુજરાત પોલીસનું ઋણ અદા કરવા આમ આદમી પાર્ટી મેદાનમાં આવીને સમર્થન કરી રહી છે.